Марий кундемыш элнан тӱрлӧ регионжо гыч марий шӱлышан, чулым, самырык, чолга еҥ-влак Россий кӱкшытан VII марий самырык тукымын слётышкыжо чумыргеныт. Ты гана тудо шымше гана эртаралтеш.
Самырык тукымын шуктен шогымо пашаже, ойыртемалтше койыш-шоктышыжо кеч-могай саманыште ойыртемалтше лийын, илышым ончыко вӱден наҥгаен. Самырык тукым – шочмо калыкнан ончыкылыкшо улеш. Лач тыгай шонымаш дене эше 2009 ийыште Марий самырык тукым слётын тулжо чӱкталын. Россий кумдыкышто тӱшкан илыше марий-влакын чолга, пӱсӧ ушан, тачысе саман дене тӧр ошкылшо шӱдӧ наре ӱдыр-рвезыже-влакым икымше гана пырля чумырен. Варажым слёт-влак Морко, Советский, Курыкмарий, У Торъял, Юлсер, Параньга районлаште эртеныт.  Тӱрлӧ темылан пӧлеклалтыныт. Тений марий самырык тукым Россий кӱкшытан шымше слётышкыжо погынен. Тиде гана тудо Провой кундемын Чакмарий селаштыже эрта. Тудо вич кече шуйна. Слётыш ты гана Марий Элнан да Российын тӱрлӧ кундемже гыч чылаже 70 наре ӱдыр-рвезе толын.
Тенийсе слётын темыже: «Пушеҥгын вийже – вожышто, калыкын – у тукымышто». Слёт жапыште ныл лужа пашам ышташ тӱҥалеш: «Мер толкын», «Еш илыш йӱла», «Сылнымутчо» да «Самырык этножурналист».
Тыге кажне лужа посна йодышым каҥашаш да шке корныж дене вияҥаш тӱҥалеш. А мучашлан кажне лужа шке паша лектышышыж дене палдарышаш. Слётчик-влакым тӱшка лекций, тӱвыра да каныме программе, Провой кундем дене палдарыше экскурсий вучат.
Слётын эмблемысе кайык иге тек сылне йӱксыш савырна, тыште мастарлыкым шуарыше кажне ӱдыр-рвезе, шке кундемышкыже миен, йырже шкеж гаяк чолга да пашаче кумылан еҥ-влакым чумыра, шӱм-чоныштышт шочмо калыкше дене кугешнымашым да тудын ончыкылыкшо верч азапланымашым ылыжта. Тунам марий тӱнянан кумданрак волгат кая.

 

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.