Изи Тавра – акрет годсо ял

Свердловск областьысе Арти район Изи Тавра селаште 9 майыште лийна. Россий калык Сеҥымаш кечым палемден. Мемнан чоныштат вургыжмаш озаланен. Кугезына-влаклан сай илышым пӧлеклымыштлан вуйнам савена да тора Урал мландыште ты кечым вашлияш пӱрымылан Курык Юмылан таум ыштена.
Изи Тавра маныт гынат, села изижак огыл, рӱдӧ илемлан шотлалтеш. Ялсоветым Пагышал ялын эргыже, марий пӧръеҥ Альберт Иванович Андреев вуйлата. Тыматле улмыж дене кумылнам савырале,  «Шийгорно» командынам порын вашлие.
Изи Тавраште школ, йочасад, медпункт да икмыняр кевыт верланеныт, 800 наре еҥ ила. «Кугезына-влак 500 ий утла ожно Изи Таврам илемыштлан ойырен налыныт. Пошкырт кундем Бирск вел гыч толыныт улмаш. «Акадра» лӱм дене Изи Тавра шочын. Кугу сарыш тышеч 196 еҥ каен, 83 еҥ пӧртылын огыл. Ялыште Кугу Отечественный сарын ик участникше — Борис Петрович Байрашев — ила. Тудын ӱдыржӧ – марий амалкалче, Йошкар-Оласе «Амарис»  фирмым вуйлатыше – Ольга Борисовна Аптышева», — палдарышт Изи Тавра клубышто. А мый пырдыжыште кечыше стендым ончышым. Тушто сарын участникше-влакын фотоштом вераҥдыме, кажныже нерген кӱчыкын серыме.
Вашлиймашна клубышто эртыш. Теве концертнам ончаш погынат, нунын коклаште эше ик поро палымынам, «Кугарня» газетын йолташыже Валерий Борисович Бакетовым ужна.
Изи Тавра клубым весела кумылан, уста гармонист Виктор Афанасьевич Александров (снимкыште баян дене шинча) вуйлата. «Сеҥымашлан пӧлеклалтше фестивальын пытартыш этапышкыже миенна, 20 еҥан коллектив пеш чапле концертым ончыктенна. Калык сайын вашлийын», — мане Виктор Афанасьевич.
Ялыште йоча-влак «Изи аршаш», кугурак-влак «Чолга шӱдыр» ансамбльлаш коштыт, тыгак «Кечыйол» драмкружок пашам ышта. Маргарита Ильинична Александрова (пурла гыч кокымшо) «Чолга шӱдыр» коллективым вуйлата. «Тӱвыра пашалан лӱмын тунемын омыл, изинек мураш йӧратем. Профессием дене ветеринар улам, а тыште 1999 ий годсек тыршем. Марий мурым муралтет, чон тул гай чӱчка. Марий артист-влак мемнан велке чӱчкыдын кошташ тӱҥалыныт. Теве ӱмаште индеш группо тольо.
Ӧрдыж гыч толшылан калык шагал погына, а шке концертым ончыктена гын, клубышто – шыҥ-шыҥ. Теве ик тыланымашем каласем: кеч-могай мурызо толеш, эреак «Йӱржӧ йӱреш», «Олма чевер» да «Канде шинча» муро-влакым мурат. Артист-влак ты мурыжым йӧратат дыр, а ончаш толшын шержым темен. Садлан ала-мо ум, сылным да палыдымым колыштмо шуэш», — каласыш Маргарита Ильинична.
Изи Тавраште шукынжо «Дружба» ООО-што пашам ыштат. Ты озанлыкым чолга марий пӧръеҥ Константин Николаевич Иванов вуйлата. Тудо Пагышалыште ила. Самырык-влак шочмо мландыштак тыршышт манын, Константин Николаевич шагал огыл вий-куатшым пышта. Теве кум шочшан механизатор Владимир Ильинлан пӧртым чоҥен пуэн. Озанлыкыште ферме уло, вольыкым кучат, мланде паша шукталтеш, икманаш, пашаче марий еҥын чонжо улан илыш верч йӱла. Озанлыкыште Изи Тавра ден Пагышал ялла гыч пашаеҥ-влак тыршат. Арти район администрацийын полышыжат палдырна. Теве «Самырык еш» программе почеш Алексей Камаевлан пӧртым чоҥашыже оксам ойырымо. Тудо Пагышалыште йочасадым вуйлата, пеш чулым да марий шӱлышан еҥ.
Изи Тавра ден Пагышал коклаште куд меҥге, еҥ-влак ваш келшен илат, унала коштыт.

Лудса «Шийгорно» проектым… Лудаш »

Татьяна Пчёлкина возен.
Иван Речкинын фотожо.

Кидшер
Шонымашым ешараш