Тений республикыштына ятыр тӱшка увер йӧн-влак (кӱчыкынжӧ ТУЙ але СМИ. – авт.) шке лӱмгечыштым палемдат. Икымше марий газет лекташ тӱҥалмылан 100 ий теме. Тудо эн ондак «Война увэр» лӱман лийын, таче «Марий Эл» маналтеш. ВГТРК-н «Марий телевидений» филиалжылан 55 ий, а Марий Эл Радиолан 10 ий теме.
Радион 10 ияш лӱмгечыжлан пӧлеклалтше концерт 2015 ий 1 августышто эртен. Кеч пайрем кечын йӱр йӱрын гынат, калык уло кумылын «Дружба» стадионыш вашкен.
Пайремыш Марий Эл Республикын вуйлатышын сомылжым жаплан шуктышо Леонид Маркелов саламлымаш дене толын. Радион директоржо Александр Курмузаковым «За заслуги перед Марий Эл» орденын медальже дене суапландареныт. Ирина Якаева да Владимир Матвеев — Марий Эл правительствын чап кагазше дене палемдалтыныт. Марина Глушкова да радиостанцийын тӱҥ бухгалтерже Валентина Казанцева — Марий Эл вуйлатышын таумутшым налыныт.
Пайремыш тыгак РФ Кугыжаныш Думын депутатше Лариса Яковлева да Марий Эл Кугыжаныш Погыным вуйлатышын алмаштышыже, Марий Оньыжа Анатолий Иванов саламлаш толыныт. Лариса Николаевна депутатын таумутшым Владимир Матвеевлан, Ирина Якаевалан да Владимир Аптулаевлан кучыктен. Анатолий Николаевич радион коллектившылан Мер Каҥашын таумутшым пуэн.
Концертыште молгунамсе семынак у муро йоҥгалте, сценышке у мурызо-влак лектыч. Икманаш, пайремыш толшо калык шуко жаплан ты татым шарнаш тӱҥалеш.
«Марий Эл Радиом» 2005 ийыште Марий Эл Республикын вуйлатышын темлымыже почеш ыштыме. Икымше гана эфирыш Мурызо Эчан (Александр Кожевников) лектын. «Поро эр, Марий Эл!» манын пелештен. Кызыт радиошто Володя Матвеев, Марина Почтенева, Владимир Аптулаев, Марина Глушкова, Сергей Карпов, Людмила Карпова, Александр Кожевников, Татьяна Соловьёва, Ирина Якаева тыршат.
«Марий Эл Радиом» радиоприёмник, машиныште улшо магнитол, интернет полшымо денат колышташ лиеш. Колышташ »
Радио тӱҥ пашаж деч посна ятыр концертым эртара. 2010 ий гыч тӱҥалын «Идалыкысе муро» концерт-фестивальым эртарат, кажне ийын Пеледыш пайремым марий этнодискотеке дене сӧрастарат. Ынде лу ий кажне кеҥежым калыкым Йошкар-Оласе стадонлаште чумырат. Ик жап «Строитель» стадионышто эртареныт, шуко калык улмылан кӧра «Дружба» стадионыш кусненыт. Кажне концертым организатор-влак ойыртемалтшым да калыклан келшышым эртараш тыршат.
Пётр Васильевын фотосӱретше-влак
1 август 2015 ий концерт «Марий Эл Радиолан» 10 ий