М. Шкетан лӱмеш Марий кугыжаныш театрын коллективше у 96-шо тургымлан кыртменак ямдылалтеш. Кеҥеж каныш деч вара артист да театрысе пашаеҥ-влак угыч пашаш лектыныт. Икымше паша кече тӱшка погынымаш гыч тӱҥалын. Погынымашке Марий Эл Республикын тӱвыра, печать да калык-влакын пашашт шотышто министр Михаил Зиновьевич Васютин толын. У тургымышто усталык вийым, у кӱкшытым тыланен, театрын у вуйлатышыже дене палымым ыштен. Ынде тиде сомылым икмыняр ий «Кугарня» газетыште тӱҥ редакторлан тыршыше Михаил Иванович Матвеев шукташ тӱҥалеш.
Михаил Иванович Советский кундем, Кугунур селан эргыже улеш. Кӱшыл шинчымашым Марий кугыжаныш университетыште налын. 10 ий «Марий Эл» теле да радио компанийыште пашам ыштен. «Запредельные марийцы» программе циклланже Олык Ипай лӱмеш кугыжаныш премий дене палемдалтын.
Каласен кодыман, театрын пашашкыже Моско оласе М.С.Щепкин лӱмеш Кӱшыл театральный училищым (институтым) тунем пытарыше самырык артист-влак ушненыт. Самырык артист-влакым, 15 августышто театрын «Салика» спектакльыштыже ончен кертыда.
Ынде «Кугарня» газетын пашаеҥже-влак театырыш спектакыльым ончаш яра пураш тӱҥалыт. 😀