Марий телевиденийын коллективше шке 55 ияш лӱмгечыже вашеш шуко мероприятийым эртарен. Тудын историйжым шукерте огыл лекше книгашке пуртымо. Вет икымше выпуск моткоч изи пӧлемыште лийын, а таче марий телевиденийым кум телеканалыште ончаш йӧн уло. Марий телевиденийын илышыштыже кажне татшым кӱчыкын фильмыште ужаш лийын. Тудым лӱмгече пайремыш толшо уна-влаклан ончыктеныт.
Эн ончычак марий телевиденийын лӱмгечыштыже ятыр ийым журналистикылан пӧлеклыше коллегына-влакым саламленыт. Нунын коклаште Марий Элын сулло журналистше лӱмым «Марий Эл» ГТРК директорын алмаштышыже, увер службым вуйлатыше Михаил Винокуров ден корреспондент Валерий Вязниковлан пуэныт. Марий Эл тӱвыран сулло пашаеҥже чап лӱмым корреспондент Людмила Васютина ден режиссёр Наталья Приходченко сулен налыныт.
Лӱмгече касыште телерадиокомпанийнан шуко пашаеҥжым ВГТРК-ан, республикысе тӱвыра министерствын да марий телевиденийын Чап грамотышт дене палемденыт. Нунын коклаште редактор, корреспондент, режиссёр, техник, телеоператор да водитель-влак. Лач нунын тыршымыштлан кӧра телевизорым ончышо чыла тӱрлӧ уверым, кундемыштына мо да кушто лиймым олык марлат, курык марлат, рушлат, суаслат пален налеш. Палемден кодыман, «Марий Эл» ГТРК национальный вещанийын редакторжо, «Кидшер» интернет-журналын редакторжо, вуйлатышын алмаштышыже Алёна Ивановалан ВГТРК-ан чап кагазшым налын.
Саламмут тыгак Марий Эл кугыжаныш телерадиокоманийын ветеранже-влак лӱмешат йоҥген. Вет лач нунын тыршымыштлан кӧра, марий телевидений тыгай кугу кӱкшытыш шуын. Кушкын толшо самырык журналист-влаклан нуно пример улыт. Пайремыш толшо коклаште Российысе телерадиокомпанийын филиалже-влак гычат шуко уна толын. А ончылно эше шуко у вашталтыш вуча. Тӱрлӧ увер нерген палдараш да калыкым тургыжландарыше йодыш-влаклан вашмутым «Марий Эл» телерадиокомпанийын усталык коллективше умбакыжат тыршаш тӱҥалеш.

 

Алена Павлова.

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.