«Кидшер» интернет-журналын коллективше тендам Российысе ик эн поро пайрем – Шинчымаш кече – дене алал кумылын саламла!
Шинчымаш кече — кажне еҥлан шерге. Вет ты кечын ме кеч кунамат школ годсо йолташ да йӧратыме туныктышо-влакым шокшын, пагален шарналтена, саламлена.
Поснак шокшын саламлена икымше классыш кайыше икшывына-влакым! Нунылан школ йыҥгыр икымше гана йоҥгалтеш, тудо сымыстарыше, чапле да ӧрыктарыше тӱняшке — шинчымаш тӱняшке — корным почеш.
Тунемше ден студент-влаклан у тунемме ийыште эн кугу кӱкшытым сеҥен налаш тыланена , тек эн чолга шонымашда илыш чыныш савырна, а дневник ден зачёткыштыда чапле да сай отметке гына лийышт. Тиде пайрем кечын пагалыме туныктышо-влаклан – чытен моштымыштлан, кугу уш-акылыштлан да шӱм-чон поянлыкыштлан – таум ойлена. Шуко чапле, кӱлешан профессий уло, но туныктышын профессийже эн суапле, тудын пашаже шинчымашым пуэн шога, тукым коклаште кылым пеҥгыдемда.
Шерге педагог, шинчымаш системын ветеранже, тунемше да ача-ава-влак! Тиде пайрем кечын тыланда нӧлталтше кумылым, чыла творческий пашаште сеҥымашым тыланена. Шӱм-чонда эре ончыко каяш да у деч у открытийым ышташ тендам нойыде ӱжын шогыжо!
Шинчымаш кече дене! Корныда пиалан лийже.
«Кидшер» интернет-журналын коллективше.