Эртыше кечылаште Россий Федерацийын сулло сӱретчыже Иван Михайлович Ямбердов 60 ияш лӱмгечыжым палемден.
Сӱретчын лӱмгечыжлан пӧлеклалтше ятыр мероприятий эртен. Йошкар-Олан историй тоштерыштыже Валерий Тумбаевын «Богема провинций. Художник Иван Ямбердов» фотоончерже, фотоальбом да «360 градус» каталог презентаций эртен. Варажым, Амстердам площадьыште верланыше Усталык ушем пӧртыштӧ да  Калыкле художественный галерейыште Иван Ямбердовын ончерже-влак почылтыныт. А кастене М. Шкетан лӱмеш театрыште сӱретчын усталык касше лийын.
Лӱмгече кечын Иван Михайлович родо-тукымжо, йолташыже, коллегыже-влак деч саламлымашым шукак наледен. Тыгак, кугу уна-влакат, Марий Эл Республикысе тÿвыра, печать да калык-влакын пашашт шотышто министр Михаил Васютин, Марий Оньыжа, «Мер каҥашын» председательже Анатолий Иванов саламленыт, ончыкыжымат у радына дене куандарен шогаш тыланеныт.

Иван Ямбердов

Иван Михайлович Волжск районысо  Чодраялыште шочын-кушкын. 1983-шо ий гычак тудо сӱрет сымыктыш фонд Марий пӧлкажын уста сӱретчыже лийын. Ятыр портрет да пейзажын авторжо. «Сандалык», «Йошкар имне-влак», «Ӱшан», «Овдасола-92» да «Мӱкш отар» сӱретше-влаклан 1993-шо ийыште кугыжаныш премий дене палемдалтын. Иван Михайловичын пашаже-влакым Финляндийысе, Венгрийысе, Израильысе, Италийысе, Эстонийысе да Элнан тӱрлӧ олаласе тоштерлаште ужаш лиеш.

Денис Речкинын фотожо-влак.

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.