Марий кугыжаныш университетын марий йылме да сылнымут кафедрыштыже вузын историйыштыже икымше гана Аврора программе почеш Вена университетын докторантше Кристиан Пишлёгер шанче стажировкым эрта. Тудо марий калыкын йылмыже, историйже да культуржо дене палыме лиеш. Диссертацийжын темыже: «Удмурт да марий йылме-влак Интернетын социальный сетьлаштыже». Ынде кумшо ий Кристиан Российыште ила, тӱҥ шотышто Удмурт кугыжаныш университетыште практикым эрта. Тенийсе тунемме идалыкше пӱтынек МарГУ дене кылдалтын: марий йылмым шымлаш тӱҥалеш.
Каласыман, мемнан вуз ден Вена университет коклаште паша кыл пеҥгыде. Кодшо ийлаште Австрий гыч ученый-влак Тимоти Ризе ден Джереми Брэдли англичан йылме дене учебникым – «Марийский язык для всех» книган кызытсе вариантшым – да марий-англичан электрон мутерым луктыныт. Тушко 50 тӱжем статьям пуртымо.
– Мый удмурт ден марий йылме коклаште икгайлыкым да ойыртемым шымлем, – ойла Кристиан Пишлёгер. – Марий йылме да сылнымут кафедре, тудын вуйлатыжыже Лидия Матросова дене палыме улам. МарГУ-што Кеҥежымсе школын марий йылме да культур курсыштыжо тунемынам. Тудо сай кышам коден. Сандене мый уэш Йошкар-Олашке толынам.

Леонид Гимаев

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.