Марий йылме могайрак таче?

Марий йылмым аралымаште да вияҥдымаште шуко паша ышталтеш: у технологийым илышыш шыҥдарат, марий концерт-программым калыклан эртарат, интернетыште тӱрлӧ марий проект-влакым вӱдат. Ик могыр гыч ончалаш гын, марий йылме аралалтеш да вияҥеш, а вес могырым кузерак?
Чаманен каласаш логалеш, йоча-влак, кугыеҥ-влак марла шагал мутланат, мутланат гынат пелыже рушла, а пелыже марла.
Мый марий рвезе улам! Изи годсекак шӱм-чонем марий йылме, марий тӱвыра да йӱла деке шӱмаҥын кушкеш. Кызыт эше самырык улам гынат, но марий йылме верч чонем вургыжлана. Очыни, чылаштын ача-авашт марий улыт, а молан кызыт самырык тукым марла шагал да начарын кутыра, марий йылме ден литературым шӱм-чон деч посна тунемеш? Кушто да мо айдемын шонымашыжым вашталта? Мыйын шонымаште, марий тӱнялан тиде йодыш тачысе кечылан эн тургыжландарыше да эн тӱҥ улеш.
Чаманен каласаш логалеш, марий шӱман еҥ-влак шагалем толыт. Ик палыме йолташем тыгайрак сӱретым ужын. Школышто улшо ик тунемше марий йылме да литератур туныктышылан ойлен пуэн: «Марий йылме мыланем огеш кӱл, мый тендан марий йылмыдам ынем тунем», а умбакыже мо лиеш? Йочаже тиде рвезын марий лиеш мо? Очыни, уке. А теве мутлан ик ӱдыр ойла: «Марий йылме дене сочинений, диктант-влакым возыктат. Мый марий йылмым палем да йӧра веле», вара марий йылмын палыме дене серлагыман мо? Тудым умбакыже тунемаш, шымлаш, калыкыште чапландараш кӱлеш. Марий йылмын ончыкылыкшо могай лиеш? Ӱшан дене илаш веле кодеш.
Коло икымше курымышто шукышт социал сетьлаште «шинчат», а тушто кузерак мутланат? Ончалына гын, сӱрет тыгаяк. Шке илышем гычак примерым конден кертам, марий йолташем-влак мыланем руш йылме дене серыш-влакым возкален «кият». Намыс огыл мо? Кок марий еҥ рушла кутырат, рушла шке шонымашыштым вашталтат.
Шарналтем ик поро йолташемын шомакшым: «Ават-ачат марий улыт гын, марла кутыро, марий койыш дене иле!», нине шомак-влакым очыни, мый омат мондо. А марий йылме дене кутырышо-влакым ме эре «йомдарена».
Туге гынат, ме марий калыкым йӧратен, пагален илышаш улына. Марла мураш да кушташ веле огыл, тыгак марий калыкын йылмыжым, тӱвыражым, йӱлажым, тудын эртыме корныжым шарнаш кӱлеш. Ме, марий калык, вожылшаш огына ул. Марла мутланаш, йочанам марий йылмылан туныкташ, марий йылме нерген вес калыклан каласкалаш, вожылде мый марий улам маншаш улына.

Кидшер
Шонымашым ешараш