М.Шкетан лӱмеш Марий кугыжаныш драме театрыште Россий Федерацийын сулло, Марий Эл Республикын калык артисткыже Маргарита Медикован «30 ий шортам, модам да воштылам…» лӱман усталык касышкыже эртен.
Лӱмгече касым марий поэт-влакын почеламутышт, спектакль гыч ужаш, мыскара да марий эстрадын шӱдыржӧ-влак сӧрастареныт.
Артисткым саламлаш журналист, тӱвыра, мер пашаеҥ, кугыжаныш кучемын представительже-влак толыныт ыле. Марий Эл Республикысе тӱвыра, печать да калык-влак паша шотышто министр Михаил Васютин министерствын да Кугыжаныш Погынын таумутшым кучыктен.

Усталык кас нерген шке шонымашыжым Зоя Михайловна Дудина ойла:

Маргарита Медикован усталык касше пеш порын эртен. Театр поян программым ямдылен, актрисым тӱрлӧ шӧрын гыч ончыктен.
Актрисе шуко рольым модын ончыктен, мыланна ушан шонымашым шарныктен, мыскарам, сылне мутым ойлен да модын. Тудын дене пырля меат изиш ушан-шотанрак лийынна, сылнымут мыскараштыже шкенам ужын воштылынна, «Ава» нерген почеламутшым колыштын, ава-влакшым ончен шортынна.
Таче моло лӱмлӧ артист-влак коклаште Маргарита Егоровна поснарак ойыралт шога. Ме, ончышо-влак, Медикован модмо спектакльышкыже тудымак ончаш гына толына. Тыгодым спектакль оҥай мо, кӧ тудым шынден, мыняр жап ты спектакль сценыште кая — шотыш огына нал. Медикова модеш гын, садак мемнан чоным тарвата: шӱмым вургыжтара, шонымашым пӱсемда, сай деч осалым ойыраш полша.
Тидлан кӧра ме йӧратена Маргарита Медиковам…

Лишыл жапыште «Кидшер» интернет-журналын лудшышт-влаклан Маргарита Егоровна дене вашмутланымашым лудаш темлена.

Валерий Тумбаевын фотожо-влак.

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.