Ноябрь мучаште 2014-2015 ийлаште литератур, сымыктыш, архитектур, шанче да технике аланыште Марий Элын Кугыжаныш премийжым налше-влакын лӱмышт пале лиеш.
Естественный да гуманитарный науко дене шанче публикаций-влаклан М.Н.Янтемир лӱмеш премийым налшаш верч икмыняр еҥ да коллектив шке кандидатурыштым темлен. Нунын коклаште Марий кугыжаныш университетын ученыйжо-влак: биологий науко доктор, профессор Сергей Смоленцев ден ялозанлык науко кандидат Алексей Роженцов улыт. Нуно «Ялозанлыкысе вольык вуйым арален кодымаште да продуктивностьым нӧлталмаште биологически активный препарат-влакым кучылтмо нерген» шанче публикаций циклыштым Кугыжаныш премий дене аклаш луктыныт.
Марий ученый-влак 2005-2014 ийлаште Марий Элысе да Татарстанысе озанлыклаште, биологически активный препарат-влакым кучылтын, сӧсна да тӱкан шолдыра вольык дене ятыр опытым эртареныт, тудо янтарный кислота негызеш ышталтын. Тиде – «Янтарос», «Янтарос плюс» да «Сукцинат железа».
Шанчызе-влак пытартыш вич ийыште 2 монографийым, вес эллаште лекше журналлаш 2 статьям, Россий Минобрнаукысо ВАК-ын темлыме изданийлаш 25 статьям савыктеныт. Тыгак тҥнямбал конференций ден симпозиумлан материалышт негызеш лукмо сборниклаште 20 статьям вераҥденыт. Ученый-влакын шымлыме пашашт 2 патент дене палемдалтын.
Каласыман, Сергей Смоленцев – университетыште да Марий элыште ик эн самырык науко доктор. Марий рвезе Кужеҥер районысо Йӱледӱр селаште шочын-кушкын, Озаҥысе ветеринарий академийым пытарен, МарГУ-што профессор марте кушкын. Ме тудын вуйлатыме шанче коллективлан Кугыжаныш премий верч таҥасымаште сеҥымашым тыланена.

Леонид Гимаев

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.