М. Шкетан лӱмеш Марий кугыжаныш драме театр 27 ноябрьыште 18 шагатат 30 минутлан Ф. Буляковын пьесыж пьесыж почеш шындыме «Эрта ӱмырем кодеш кумылем…» трагикомедийым ончаш ӱжеш.
Пьесе почеш, Кугыза деке вучыдымын Колымаш толын лектеш… Тудо Кугызалан икмыняр жаплан ӱмыржым шуяш йӧным пуа. Ик поро пашалан Кугыза эше лу ийым илен кертеш. Кӱчык кум шагат жапыште саде сомылым ыштен шуктыман. Могай йӧнысыр вуча Кугыза ден Кувам? Кузе нуно ӱмырыштын пытартыш шагатыштым эртарат?
Спектакль мучко герой-влак, шкеат тидым шижде, илышыштын эн тӱҥ йодышыштлан вашмутым кычалыт: йӧратеныт, йӧратат нуно икте весыштым але уке? Кува ден Кугыза самырык пагытыштым шарнен-шарнен вашмутым кычалыт…
