16 C
Йошкар-Ола

Марий Оньыжа марий калыкым Талешке кече дене саламла

Пагалыме марий калык! Марий Мер Каҥаш лӱм дене чыландамат алал кумылын Марий талешке кече дене саламлем!
1990 ийла тӱҥалтыш годсек кажне ийын 26 апрельыште марий калыкна тиде кечым ик эн жаплыме пайрем семын палемда.
1556 ийыште лач 26 апрельыште Малмыж орым аралымаште Полтыш лӱман тусо марий он тале кредалмаште геройлын шке вуйжым пыштен. А 1917 ийыште Пошкырт кундемысе Пӱрӧ олаште эртыше Икымше Марий погынышто лӱмлӧ просветитель Павел Глезденёв тиде кечым чыла марий талешке-влакым шарналтыме кече семын палемдаш тӱҥалаш темлен.
Кызыт пÿтынь марий калык кумда Россий мучко тиде кечым палемда. Ола ден посёлкылаште, тыгак яллаштат марий чолгаеҥ-влакын таратымышт почеш талешке-влак лÿмеш сортам чÿктат, нуным порын шарналтат да, суап пашаштлан тауштен, вуйыштым сават.  2014 ийым Российыште Тÿвыран идалыкше семын увертарыме. Тидым шотыш налын, кажне марий еҥлан шочмо тÿвырам арален кодымо да вияҥдыме шотышто кугурак тÿткышым ойырыман. Школлаште марий койыш-шоктышан шукырак мероприятийым ямдылыман, тыгодым марий талешке-влакын илыш-корныштымат келгынрак лончылыман.А эн тÿҥжö – марий калыкнан волгыдо ончыкылыкшо верч талешке-влак семынак чолган да талын илаш тунемман. Кажне марий еҥлан иктым шарныман: курымла вошт мемнан койыш-шоктышнам да кажне ошкылнам талешке кугезына-влак Чоткар, Чумблат, Акпатыр, Полтыш, Акпарс тӱткын эскерат.
Пагалыме марий-влак! Ончыкыжымат шке калыкнам жаплаш, шочмо йылмынам аклаш, тудын дене вожылде мутланаш, марий тӱвыранам йӧраташ да эреак вияҥден толаш, тыгак кугезе йӱланам шарнаш, а самырык тукымым марий шӱлышеш шуараш ӱжам.
Чылаландат пеҥгыде тазалыкым, кужу ӱмырым, вашла пагалымашым да пиалым тыланем.
Пайрем дене!

Марий Оньыжа А.Н. Иванов.

Тыгак лудса

ОСТАВЬТЕ ОТВЕТ

Пожалуйста, введите ваш комментарий!
пожалуйста, введите ваше имя здесь

Лимит времени истёк. Пожалуйста, перезагрузите CAPTCHA.

spot_img

Увер йогын

Кызыт лудыт