Декабрь тӱҥалтыште вузышто Калык-влак келшымаш пайрем эртен. Тушко верысе студент-влак дене пырля Таджикистан, Узбекистан, Туркменистан, Киргизий, Азербайджан, Афганистан, Австрий гыч МарГУ-што тунемше-влак чулымын ушненыт. Пайремышке уна-влакым ӱжмӧ – вузын ректоржо М.Н. Швецов, профкома вуйлатыше Л.А. Садовина, РФ МИД-ын Йошкар-Оласе представительствыжын кумшо секретарьже А.А. Утятин погынышо-влакым пайрем дене саламленыт да тӱрлӧ элысе ӱдыр-рвезе-влаклан университетын икоян ешыштыже келшен да икте-весылан полшен илаш, тунемаш, мер пашаште тыршаш тыланеныт. 
Пайремыште чынжымак поро, келшымаш шӱлыш озаланен. Йотэл гыч толшо кажне студентлан шке элже, тӱвыраже нерген каласкалаш, национальный кочкыш дене палдараш йӧн лийын.
Мероприятийыш толшо таджик ӱдыр Мухайёхон Абдуллаева тыге палемдыш: «Келшымаш пайрем чынжымак мемнам уша, икояным ышта. Кодшо ий дене таҥастарымаште йотэлла гыч толшо студент-влакын чотышт ятырлан ешаралтын. Мый куанем, тиде пайремым эртараш Калык культур да тӱвыра кокласе кыл институтлан ӱшаненыт. Таче мый вес элла нерген утларак пален нальым, нунын кочкышыштым тамлен ончышым, шкежат шочмо калыкемын тӱвыраже нерген каласкалышым – тудын дене пеш кугешнем. Тыгай пайремым эртарыше-влаклан кугу таум каласем».

Леонид Гимаев

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.