-10 C
Йошкар-Ола

«Марла чын возена» диктантым иктешлыме

Тиште кечым пайремлыме кышкарыште кумылан-влак ынде кумшо гана «Марла чын возена» диктантым возеныт. Тудым Марий Эл Республикын тӱвыра, печать да калык-влакын пашашт шотышто министерстве, Республикысе марий тӱвыра рӱдер да Марий кугыжаныш университет эртареныт.
Диктант, участник-влакын регистрацийым эртымекышт, 9 шагатлан МарКУ-со калыкле тӱвыра да тӱвыра кокласе коммуникаций институтышто тӱҥалын. А республикысе районлаште да марий-влакын тӱшкан илыме вес кундемлаште возышо-влаклан диктантын текстшым электрон почто дене колтымо. 
Возышо-влак радамыште марий йылмым тӱрлӧ кӱкшытыштӧ палыше школын да кӱшыл тунемме заведений-влакын тунемшышт, туныктышо да методист, воспитатель, шанче, тӱвыра да печать пашаеҥ, кугыжаныш да муниципал служащий-влак лийыныт. Чылаже – 1775 еҥ.
Районлаште да вес кундемлаште возышо-влак коклаште сеҥыше-влакым верлаште палемденыт, Марий кугыжаныш университетыште серыше-влак гыч лекше сеҥыше-влакым 10-шо теле тылзын Тиште кечылан пӧлеклалтше пайремыште саламленыт. Пайрем кас М. Шкетан лӱмеш Марий кугыжаныш драме театрыште эртен.

  • Школышто да лицейыште тунемше-влак коклаште 1 верыш Кошкина Дарья Николаевна лектын (Кужеҥер район, Коҥганур школ, 11 класс), 2 верыште – Музипов Салават Владимирович (Калыкле президент сымыктыш школ, 9 «б» класс), 3 верыште – Александрова Эльза Эдуардовна (Йошкар-Ола, 14-ше №-ан гимназий,10 «а» класс).
  • Студент да моло участник-влак кокла гыч сеҥыше-влак радамыште: 1 вер – Соколова Вероника Аркадьевна (МарКУ, 3 курс), 2 вер – Иванова Ольга Вячеславовна (МарКУ, 3 курс), 3 вер – Тобекова Галина Степановна (Кужеҥер район, Коҥганур школ, марий йылме да литературым туныктышо).
  • Диктантым курык марий йылме денат возеныт, сеҥыше-влак: 1 вер – Кондратьева Анастасия Руслановна (МарКУ, 3 курс), 2 вер – Семенова Татьяна Венедиктовна (МарКУ, 1 курс), 3 вер – Топтыгина Анастасия Владимировна (МарКУ, 4 курс).

Каласен кодыман, диктант Марий Эл Республикысе калыкын шочмо марий да кугыжаныш йылме деке кумылжым савырыме да 2011 ийыште лекше у орфографий мутерын правилже-влакым илышыш шыҥдарыме амал дене эртаралтын.

Леонид Гимаев

Читайте также

ОСТАВЬТЕ ОТВЕТ

Пожалуйста, введите ваш комментарий!
пожалуйста, введите ваше имя здесь

Лимит времени истёк. Пожалуйста, перезагрузите CAPTCHA.

Увер йогын

Кызыт лудыт