Кодшо кечылаште Марий кугыжаныш университетыште «Здоровая инициатива» — регион-влак кокласе кокымшо форум эртен. Тушко вич кундем — Татарстан, Чуваший, Марий Эл, Киров да Ульяновский областьла — гыч 130 утла студент погынен. Тыгак Китай Калык Республик гыч Россий вузлаште тунемше 7 студент толын.
Форумым МарГУ-со студент ушемын пашажым вияҥдыме программе кышкареш эртарыме. Тудо студент ешыште таза илыш йӱлам шыҥдарыме, наркотик ваштареш кучедалме йодышлаш виктаралтын. Форумым эртарымашке образований да науко министерстве ден Россий ФСКН-ын Марий Элысе управленийже кумылын ушненыт.
Пленарный заседанийым МарГУ-н ректоржо Михаил Швецов почын. Вара икмыняр докладым колыштмо. Тӱҥ докладым наркотик ваштареш кучедалме да профилактикым эртарыме пашан лектышыже нерген республикысе УФСКН-ын отдел вуйлатышыже Наталья Отмахова ыштен. Марий Элысе прокурорын полышкалышыже Ольга Лаптева самырык-влак коклаште наркотик шотышто профилактикым эртарымаште прокуратурын верже шумлык каласкален. Тыгак психиатр-нарколог Нина Данилова, Москва гыч уна Денис Шаблий оҥай докладым ыштеныт. Пленарный заседаний мучаште «Здоровая инициатива» школын координаторжо, юридический факультетын студенткыже Анастасия Егошина форумын да проектын пашаштым иктешлен.
Вара кок секцийыште паша шуйнен, участник-влак «Арт-терапий» мастер-классыш погыненыт, тыгак нуно Волжск оласе школ-интернатыште лийыныт, тушто активист-волонтер-влак йоча-шамычлан наркопрофилактике шотышто лекцийым лудыныт.
Вес эл да Россий кундемла гыч толшо студент-влак МарГУ-што эртыше форумлан кӱкшӧ акым пуэныт.
Леонид Гимаев