Морко районысо Масканур ялыште шочын-кушшо Татьяна Денисова марий калыкнан эн йӧратыме да эн пагалыме ӱдыржӧ.  Татьяна Весшÿргӧ ялысе кыдалаш школым тунем пытарен. Ачаже гармоньым шоктен моштышо, аваже мураш йӧратыше лийыныт. Таня изинекак мурашат, гармоньым шокташат тунем шуктен. Школысо самодеятельностьыш коштын, шуко гана пайрем концертлаште мурен. Школ деч вара Морко посёлкысо 24-ше номеран СПТУ-ш штукатур-малярлан тунемаш пурен. Туштат художественный самодеятельностьын активный участникше лиеш. Училищыште «Рвезылык» ансамбль лийын. Татьяна ансамбльыште эн тале солистка семын ойыртемалтын. Яндар йÿкшӧ ден чыла ончышо-влакым куандарен.
1985 ийыште Таня Йошкар-Олашке илаш толеш. Тыште «Марий памаш» ансамбльыш ÿдыр-рвезе-влакым погат манмым колын, тергымашыш мия. Ансамбльым вуйлатыше В.П. Данилов, сай йÿк дене сылнын мурымыжым колын, Татьянам тунамак коллективыш налеш. Ансамбльыште Татьяна солистка семынат, тÿшкан мурымаштат участвоватла.
«Марий памаш» дене пырля республика мучко да республика деч ӧрдыжкат коштеш. Чыла вере тудым яндар йÿкан мурызо семын палаш тÿҥалыт. Санденак «Яндар-яндар» калык мурым мурымыжым Марий радио дене йоҥгалтареныт. Тиде муро дене Татьяна Денисова уло республикылан у мурызо семын палыме лиеш. Тиддеч вара композитор Вениамин Захаровын «Вучыдымо вашлиймаш», «Изи кайык», «Ош йолгорно» мурыжо-влакым йоҥгалтара.

Тыге тудо 1993 ий гыч, «Марий памаш» деч ойырлен, моло композитор-влакын мурыштымат Йошкар-Олаште эртарыме пайрем концертлаште мурен коштеш. Репертуарже кугеммеке, пÿтынь концертым усталык касыште шкетынак ышта. Илен толын Марий филармонийын артисткыже лиеш. 1990 ийыште Смоленскыште эртыше «Голоса России» Всероссийский конкурс гыч дипломант лийын пӧртылеш. 1994 ийыште Словакийын Нитра оласе Тÿнямбал молодежь фестивальыште посна приз дене палемдалтеш. Фестивальыште Татьяна «Яндар-яндар» мурым йоҥгалтара. 2006 ийыште Татьяна Денисова Озаҥ оласе тӱвыра да сымыктыш университетым тунем пытарен.
Шуко-шуко мурыжо марий эстрадыште хит улыт. Нине муро-влакым те, 19 апрельыште 17 шагатлан В. И. Ленин лӱмеш тӱвыра полатыште «Тыяк веле» концертыште колын кертыда. Кеч шукерте огыл, Татьяна тыгай концертым эртарен ыле, но тиде кечылаште мыланна йыҥгыртен 19 апрельыштат концертым эртарымыж нерген увертарыш. Касым сӧрастарат: Василий Якимов, Роза Искакова, Валерий Тихонов, Марина Садова, Ольга Зарецких да тендам йӧратыше да пагалыше Татьяна Денисова.

Пётр Васильевын фотожым кучылтмо;

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.