Пытартыш жапыште «Каче-влак» группышто вашталтыш палдырнен. Сценыш Михаил Басов ден Сергей Попов гына лектыныт. Ушештарем, кодшо ийын Валерий Чиванов ты группо гыч каен.
Эртыше кечылаште группо шотышто вес увер пурен. «Каче-влак» группыш у мурызо ушнен. Тиде — Илья Якимов. У состав дене у группым 12 февральыште Советский районысо Кукмарий ялыште ужаш лиеш. Кызыт Илья репертуарым шымла, муро-влакым тунемеш.
Шым ий жапыште, «Каче-влак» группо калыкыште шке колыштшыжым муын. Умбакыжат марий эстрадыште чолгалыкыштым ончыктен, калыкым куандараш, шӱдыр семын йӱлаш тыланена.
