МарГУ-н эндаумент-фондшо – республикыште икымше

Марий кугыжаныш университетым умбакыже вияҥдыме шонымаш дене, целевой капиталым негызлыме шумлык, эндаумент-фондын презентацийже эртен. Тиде целевой фонд, тушко посна еҥ ден организаций-влак шке кумылын взносым чумырат да тиде шийвундо образований, медицине, культур тӧнеж-влакым финансироватлаш кучылталтеш.
МарГУ-н эндаумент-фондышкыжо икымше надырым «МДМ Банк» публичный акционер ушем пыштен – 3 миллион теҥгем ойырен. Тиде целевой капитал, тудым айда-лийже кучылташ ок лий. Инвестиций парышым пуа, тудо эре ешаралт толеш.  Тиде окса университетым вияҥдыме тӱрлӧ программым да студент проект-влакым финансироватлымашке кая.
Презентацийым вузын ректоржо Михаил Швецов почын. Тудо «МДМ Банк» публичный акционер ушем да тудын Йошкар-Оласе операционный офисшын управляющийже Алексей Жилинлан МарГУ-што у тунемме программе ден шанче шымлымаш-влакым эртараш финансированийым ешарымылан кугу таум каласен.
Алексей Витальевич МарГУ-н тӱҥалтышыжым сайлан шотлен: – Тиде республикыште але икымше эндаумент-фонд, – палемден тудо. – Инвестиций гыч пурышо парыш студент-влакын проектыштым илышыш шыҥдараш сай йӧным ыштышаш, тидыже поснак куандара, – палемден тудо.
Вузысо студент ден аспирант-влак советын председательже Павел Козлов «МДМ Банклан» тауштен да студент да аспирант-влак лӱм дене тыге каласен: – Тендан тӱҥалтышда ончыкылыклан сай ӱшаным ышта: тунемаш, наукышто да творчествыште у кӱкшытыш шуаш йӧн ешаралтеш. Ынде шукыжо мемнан деч шога – чолга да чулымрак лийман, кыртмен пашалан пижман.

Леонид Гимаев.

Кидшер
Шонымашым ешараш