М.Шкетан лÿмеш Марий кугыжаныш драме театр 16 февральыште С.Николаевын «Салика» комедийжым Озаҥ оласе Камала театрын сценыштыже ончыкта. Каласен кодыман, театр-влак коклаште келшымаш кодшо ийынак пеҥгыдемын. Марий артист-влак татар театрын сценыштыже «Юмынÿдыр» мюзиклым ончыктеныт гын, Озаҥысе театрын артистше-влак марий сценыште «Пелганде шаль» спектакльым модыныт.
«Тачысе кечылан тиде поро йÿлам умбакыжат шуяш кок могырымат кумыл да йöн уло. Озаҥ олаште илыше чыла марий калыкым уло кумылын 16 февральыште Камала театрын полатыштыже вучена», — ойла М.Шкетан лӱмеш театрын зритель дене пашам ыштыме шотышто директорын алмаштышыже Надежда Мамаева.
Спектакль деч посна театрын фойештыже фотовыставке пашам ышташ тÿҥалеш. Марий артист-влак толшо-влакым шÿвыр-тÿмыр сем аршаш ден куандарат. Тыгак тиде кас нерген поро шарнымашым кодышо марий сувенир-влакым налаш йöн лиеш.
Спектакль 19.00 шагатлан тӱҥалеш.
