Рушарнян, 20 мартыште, Марий кугыжаныш университетыште Почмо омса кече эртен. Тиде кечын абитуриент-влаклан вузын чыла омсаже виш лийын. Нуно тиде шкешотан пайремыште шуко кӱлешан да пайдале уверым пален налыныт. Ончылык студент-влак дене эн ончыч университетын ректоржо, факультет ден институт-влакын вуйлатышышт мутланеныт. Нуно университетыш тунемаш пурымо правил-влак дене палдареныт. Тыгак Почмо омса кечышке вузын стратегический партнержо-влак лийыныт. Абитуриент-влаклан ончыкылык пашам пуышо-шамыч дене мутланаш йӧн лийын. 
Тӱҥ корпусын фойештыже университетын 85 ияш лӱмгечыжлан пӧлеклыме фотовыставке эртен. Вузын стратегический партнержо-влак шке сатушт дене палдареныт.
Абитуриент-влаклан тӱрлӧ конкурс эртаралтын. Сеҥышыш лекше-влаклан купоным кучыктеныт. Тудын дене тунемше-влаклан оксам тӱлыде «Меридиан» кафеште кочкаш, зоологий тоштерыш пураш да МарГУ-н фотолабораторийыштыже фотокарточкым ышташ йӧн пуалтын. Тӱҥ приз – тиде «Олимпиец» спорт да тазаҥдыме лагерьыште канаш путевко. Призым Йошкар-Оласе ик школышто тунемше Татьяна лӱман ӱдыр сеҥен налын.
Пайремым вузысо «Цармис» куштышо театр руш калык куштымаш дене почын. Тыгак моло студент-влакат сылне да весела муро-куштымаш дене куандареныт.
«Тений МарГУ 85 ияш лӱмгечым пайремла. Тынар ий жапыште университет кугу кӱкшытыш шуын», – каласен кодыш Марий кугыжаныш университетын ректоржо М.Н. Швецов.
Вара факультет да институтлаште мастер-класс-влак эртеныт. Вузын туныктышыжо, студент да тунем пытарше-влак дене вашлияш йӧн лийын. Абитуриент-влак университет нерген шуко уым да тургыжландарыше йодышлан вашмутым пален налыныт.
Чылаже Почмо омса кечыште 700 утла еҥ лийын. Тушко Марий Эл Республике гыч веле огыл толыныт, тыгак Киров, Нижегородский область, Чуваш да Татар республикла гыч лийыныт.
Анастасия Коробейникова, Йошкар-Оласе медицине колледжын студенткыже: 

«Мый уло кумыл дене Марий кугыжаныш университетын ушнем. Кум тылзе гыч «Эмлыме паша» специальностьыш документым пуэм. Мый врач лийнем, еҥ-влаклан полшынем. Тыште шочмо пӧртем, шочмо республикем, тыштак тунемнем да пашам ыштынем».

Леонид Гимаев

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.