Семӱзгарым шокта, сылне мурым мура!

И.Палантай лӱмеш тӱвыра да сымыктыш колледжын студентше-влак тунеммышт годымак келшыше пашам ышташ тӱҥалыт. Ӱдыр-влак коклаште шукынжо сценылан шӱмаҥыт, яндар йӱкышт, сылне мурышт дене калыкым куандарат.
Лаштыкнан тачысе унаже Татьяна Фоминых нергенат тыгак ойлаш лиеш. Татьяна ты колледжын калык семӱзгар отделенийыштыже кумшо курсышто тунемеш. Тудын шочмо вер-шӧржӧ — У Торъял районысо Токтарсола ял.
-Ялысе школышто нылымше классым тунемме деч вара Йошкар-Олаш толаш, Национальный президент школыш тунемаш пураш кӧ темлен?
— Кресавам Йошкар-Олаште ила. Тудо тушко тунемаш пураш могай экзамен-влакым кучыман, илыме условий могайрак да моло йодышым рашемден. Экзамен-влакым сдатлаш неле лийын огыл. Но Национальный президент школын тунемшыже лиймеке, кум тылзе эре шортынам. Кресавам, тукым ака-шамыч чӱчкыдын мый декем коштыныт.
Индешымше класс деч вара Палантай лӱмеш тӱвыра да сымыктыш колледжым ойырен налынам. Семӱзгарым икымше класс гыч шокташ тунемме ты корно гыч кораҥден огыл. Кызыт колледжыште оркестрыште шоктем. Баян, балалайке, домр, жалейке да эше икмыняр семӱзгар дене семым луктын кертам.
— Семӱзгар тылат моткоч лишыл. А эстрадыш кузе логалынат?
— Икымше курсышто тунемме годым Аделина йолташ ӱдырем дене Марий тӱвыра рӱдер пеленсе «У муро» кружокыш кошташ тӱҥалынна. Александр Мамаевын «Теле садыште» мурыжо чонеш логалын. Тиддеч вара тудынак возымо «Кече», «Ош каваште», «Эн лишыл улыда мыланем», «Эр южым шӱлалтем» сылнымут саскаже-влак репертуарем пойдарышт. Тыгак такмак-влакым йоҥгалтараш келша. Ончыкыжым репертуарышкем тошто такмак-шамычым пуртынем. Лишыл жапыште калык ончык у муро дене лекташ шонем. Альбертина Иванован возымо «Пӧртылам, авай» почеламутшылан семым Сергей Маков келыштарен.
— Кугу сценыш лекташ лӱдмашан лийын?
— Авам ончыч клубышто художественный вуйлатышылан ыштен. Ялыште могай концерт лийын, изи годсек эре муренам.
Изи улам, изи улам,
Киса кайык гай улам… — корнылам ныл ияш годымак йоҥгалтаренам.
А кызыт колледжыште, Марий кугыжаныш университетыште пайрем кумылым пурташ ӱжыт гын, торешланымаш уке.
Кодшо ийын икмыняр мурызо дене пырля Пошкырт кундемыш, Свердловскыш, Пермьыш гастроль дене миен коштмо. Кугурак-влак дене ик сценыште мураш – кугу пиал. Нунын пашаштым ончен, опытым погаш лиеш. Ӧрдыж кундемыште илыше-влакын тӱвыраштым, йӱлаштым пален налаш оҥай.
— Тыйын икымше аклышет кӧ?
— Ончаш толшо-влак коклаште ача-авам лийыт гын, эн кугу эҥертыш. Нуно мурымем, сценыште шкем кучымым аклат, ой-каҥашым пуат. Мутлан, тӱҥалтыште сценыште вожылшо, аптыраныше лийынам. «Ласкарак шкендым кучо. Ит лӱд». Авамын нине ойжо-влак эре пылышыштем йоҥгат. Жап эртыме семын шкемым ласканрак кучаш тӱҥалынам, шонем.
— Колледжым тунем лекмеке, шкендым кушто ужат?
— Ончыкылык нерген ойлаш эше эр. Чылаж годым каласыме семынат огеш лий, мӧҥгешла савырна. Мылам семӱзгар дене шокташат, мурашат моткоч келша.
— Яра жапым кузе эртарет?
— Студентын, поснак тӱвыра да сымыктыш колледжыште тунемшын, мыйын шонымаште, яра жапше моткоч шагал. Туге гынат ешартыш оксам ыштен налаш тыршем. Оласе ик ковайлан пачержым эрыкташ, кевытыш, аптекыш миен толаш да моло пашалан полшаш коштам. Уке гын, тӱжем теҥге стипендий тылзылан илен лекташат огеш сите.

Алевтина Байкова мутланен.
«Марий Эл» газетын 2014 ийысе 10 майыште
лекше номерыштыже лекше материал.

Кидшер
Шонымашым ешараш