«Кугарня» газет дене пырля «Воштылаш, товатат, сулык огыл!»

«Кугарня» газет редакций кажне ийын Воштылчык кечын «Воштылаш, товатат, сулык огыл!» мыскара конкурсым эртара. Теният ты йӱла шукталтын.
Йошкар-Оласе В.Ленин лӱмеш тӱвыра полатыште ты кечын ик яра верат лийын огыл, тугеже 800 утла еҥ весела вийым пуышо «эмым» йӱын. Кажныже, очыни, воштылын, шыргыжын, муралтен да илышын уто-ситым ужын, шкаланже могай-гынат иктешлымашым ыштен.
Фестивальыште 17 номер ончыкталтын. Тыште посна монологым лудшо да сценкылам ончыктышо участник-влак лийыныт. Кугу сценышке сай номерым лукташ манын, районлаште отборочный тур-влак эртеныт. Фестивальыш толшо мыскараче-влакын номерыштым режиссёр-влак О.Иркабаев ден В.Григорьев ончен лектыныт, ой-каҥашым пуэныт. Но ала-молан южо участник, сценышке лекмек, садак шке семынже утым «куктыштын», кужун кучалтын. Тыге оҥайлык йомеш, мыскаражат ончаш толшым сырыкта веле, шонем. Вес гана тыге ынже лий манын: вич-шым минут деч кужун шуйнышо сценкым организатор-влак программыш огыт пурто. Мыскара спектакльыш савырна гын, действийын писылыкше да оҥай шонымашыже йомеш. Умылаш лиеш, кажнын мыскараже шкаланже эн оҥайын да чаплын чучеш. Но тыгодым ончаш толшымат савырен моштыман, организатор-влакын йодмашыштымат шотыш налман. Ты гана ятыр у лӱм лектын, у коллектив толын.

Икымше верлам да окса премийым Параньга районысо Усола клубын ямдылыме «Кызыт илыш тыгае» (авторжо Светлана Ларионова) ден Моркысо йоча образцовый театр «Чыла «К» буква гыч» (авторжо Анна Якушева) сценкылашт дене налыныт. Кокымшо верым «Марий подкогыльо» командылан пуэныт, «Амарис» фирмын сертификатшым кучыктымо. Кумшо верышке Морко район Тыгыде Морко клубысо драмкружокын участникше Р.Александрова ден Э.Крижановский «Вÿльö Öрчöмö» мыскарашт дене лектыныт, нунылан пароварке логалын. Кажне участник кумылаҥдыше пöлек дене палемдалтын. Касым мыскараче-влак Валентина Ефремова ден Вера Мочаева устан вÿденыт.
Жюри пашам ыштыме жапыште Морко гыч «Рвезылык» ансамбль, Параньга район Усола гыч «Мурпеледыш», Советский посёлко гыч «Кугезе кумыл», Звенигово районысо Кужмара гыч «Воштончыш» куштышо да фольклор ансамбль-влак, Волжский районысо Карай клуб ден Морко районысо Тыгыде Морко клубын пашаеҥышт сӧрастареныт.
Йолташ-влак, воштылаш, товатат сулык огыл. Илышлан куанен илыза да йыр улшо нелылыкым сеҥаш тыршыза.

Татьяна Пчёлкина
Иван Речкинын фотожо-влак.

Кидшер
Шонымашым ешараш