Чумыр марий калык шке уста йылмызыжым йомдарыме дене чамана. Ага тылзын 14 кечынже Советский районын эргыже, филологий шанче кандидат да доктор, профессор Анатолий Николаевич Куклинын шӱмжӧ вучыдымын кырымым чарнен. Тудлан 68 ий ыле.
Анатолий Николаевич 1948 ий 23 пургыжышто Советский районысо Шӱргыйымал ялыште шочын-кушкын. Ӱшнӱр школым тунем пытарымек, шинчымашым умбакыже погаш Оршанке педучилищыш тӱҥалтыш школышто туныктышылан тунемаш пурен. Варажым, тунем лекмек, Совет армий радамыште служитлен. 1971 ийыште Н.К. Крупская лӱмеш Марий пединститутыш шинчымашыжым нӧлташ пурен. 1976 ийын историй да филологий факультетысе руш йылме да литератур, марий йылме да литератур отделенийым тунем лектын. Институтым тунем пытарымек, икмыняр жап В.М. Васильев лӱмеш йылмым, литературым да историйым научно шымлыше Марий институтышто ыштен. 1978 ийыште Тарту университетыште аспирантурыш тунемаш пурен. Тунемме жапыште йылмышанчыште эше шымлыдыме але шагал шымлыме йодыш-влакым рашемдаш тыршен. 1998 ийыште А.Н. Куклин филологий шанче доктор лӱмым сулен налын. 2008 ий гыч Финно-угроведений институтын директоржо лийын.
Анатолий Николаевич Куклин дене чеверласымаш 16 аган 10 шагатат 30 минутлан Марий кугыжаныш университетын «П» корпус ончылныжо лиеш.
«Кидшер» интернет-журналын коллективше родо-тукымжылан, пелашыж ден шочшыжлан, Марий кугыжаныш университетын ешыжлан келге чаманымашым ойла.

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.