Йошкар-Олаште финн-угор студент-влакын форумышт эртен

Марий кугыжаныш университет негызеш 23-24 майыште «Финн-угор калык-влакын поянлыкышт» III тӱнямбал финн-угор студент форум эртен.
Форумыш молодежный политике, туныктымо паша, тӱвыра, тазалык аралтыш, социологий, историй, психологий, педагогике да моло аланыште шымлымашым эртарыше студент ден аспирант-влакым, тыгак университетла негызеш почмо шанче-шымлыше да увер рӱдерлам вуйлатыше студент ден аспирант-влак чумыргеныт. Тыште 22 кӱшыл да кыдалаш профессиональный образований тӧнежла гыч 248 студент ден аспирант толын. Нуно Россий Федерацийын 11 субъектше (Башкортостан, Карел, Коми, Марий Эл, Мордва, Татарстан, Удмурт, Чуваш республикла; Хант-Мансий автономный округ, Пермь край, Волгоград область, Санкт-Петербург ола), тыгак Австрий, Канада, Германий, Франций гыч лийыныт.
Форумын шке пашажым пленар заседаний гыч тӱҥалын, тушто форумын участникше-влак шке докладыштым лудыныт. Кастене уна-влаклан МарГУ-н волонтер ешыже Йошкар-Ола мучко экскурсийым эртарен, Царевококшайский кремльыште лийыныт, «Егоровский вернисаж» сӱрет выставкым, тысе кинозалыште 1929 ийыште войзымо «Марийцы» документальный фильмым онченыт. Икымше кече Эрик Сапаев лӱмеш опер да балет Марий национальный театрыште мучашлалтын. Театрын труппыжо ончышо-влакым тӱнямбал классикын да марий композитор-влакын сем произведенийышт дене палымым ыштен.
24 майыште 12 тематический секций ден подсекцийыште делегат-влакын докладыштым колыштмо. Пашам мучашлымеке, вузын актовый залыштыже форумын резолюцийжым пеҥгыдемдыме. Жюри эн сай докладлан озаштым палемден. Нунылан I, II да III степенян дипломым кучыктымо.
IV тӱнямбал финн-угор студент форумым 2017 ий майыште уэш Йошкар-Олаште, МарГУ-што эртараш палемдыме.

Леонид Гимаев

Кидшер
Шонымашым ешараш