Ӱмаште «Марикино» киностудий «Ял ӱмбалне мужыр йӱксӧ» лӱман марий фильмым возен да калык коклаш луктын ыле. Ынде икмыняр тылзе тиде диск «Марий пӧлек» киосклаште ужалымаште уло.
Тачысе кечылан «Марикино» киностудий у фиьмым ямдыла. Фильмлан сценарийым драматур да актрисе Зинаида Долгова возен. Режисер Олег Иркабаев фильмым луктымаште тырша. Фильмлан эн ондак индешымше февральыште Руш драмтеатрыште кастинг эртен, эн сайже-влак фильмыште модаш тӱҥалыт. Тыге Оксинан рольжым — Марий Элын сулло артисткыже Марианна Сильвестрова, Тачанан рольжым — Марина Почтенева, Ольошын койышыжым — Евгений Ибраев, Петюн рольжым — Артём Иркабаев, Сапанын — Андрей Бусыгин, Андрэн рольжым — Марий Элын сулло артистше Сергей Мамаев. Нуно чыланат «Олманурын оръеҥже» кином сӧрастарат. Съёмке кеҥежым лиеш, а кызыт шуко жап репетицийлан ойыралтеш. Икымше фильмым Кужеҥер районысо Йывансола ялыште эртен гын, кокымшо Морко районысо Нурӱмбал ялыште, Йошкар-Олаште эрташ тӱҥалыт. «Марикино» студийын пашаеҥже-влак фильмым У ийлан ышен шукташ шонат.