Йошкар-Олаште – Пеледыш пайрем, Сургутышто – Соцветий!

Марий кундемыштына, июнь тылзыште, калык Пеледыш пайремлан ямдылат шога гын, йӱдвел Сургутышто тыгаяк сынан «Соцветие» пайрем 5 июньышто эртыш.
«Соцветие» — тиде олаште илыште тӱрлӧ калыкын тӱвыражым ончыктышо фестиваль, олан «брэндше» улеш. Верысе администраций да тӱрлӧ калыклыкын мер организацийышт тыршымышт дене ынде 19 гана эртыш. Ты ганат ончаш толшо-влак тӱрлӧ-калыкын мурымыштым да куштымыштым концертыште ончен, кажне калыкын шке шотан сӧрастарыме кудывечышкышт унала пурен, чесым тамлен, тӱвыраштым шымлен кертын.
«Соцветий» ий еда теме да сынже вашталт шога, у сюжет-влак дене ешаралтеш. Тений Юграште йоча ийым увертарымылан кӧра, фестивальын темыжат тыгак йоҥгыш. Садлан, сылне калык вургемым чийыше изи пеледыш гай «колой»-влак эн тӱҥ уна але персонаж лийыныт. Тӱрлӧ нациян икшыве-влак ваш-ваш унала коштыныт, посна калыкын модыш-вакышт дене палыме лийын модыныт, келшымаш сӱретым асфальтеш пырля сӱретленыт. Ончышо-влаклан тений у площадке — «Калык шепка» интерактив ончер поснак келшен. Тӱрлӧ нацийын йочам малыме, рӱпшымӧ олмышт, чынжымак, чотак ойыртемалтеш улмаш. Тыгак кажне шепка пелен, пуйто шепкаште кийыше изин аваже але коваже улшыла мурызо-влак шинченыт, нуно черет почеш, азам рӱпшышын койшын, шке йылмышт дене малтыме мурым муреныт.

Сургутышто чылаже чот почеш 23 калыкле ушем уло. Тений пайремыш 17-ын ушненыт, нунын коклаште марий-влакат, тиде «Марий ушемын» Сургутсо мер организацийын пӧлкаже да тудын пелен погымо «ЮМарий» этнокультур коллектив. Ойыртемалтшын, ончер пӧрт сынан шке кудывечыштым сӧратстерныт, пӧлем покшелне кугу ӱстелым марий чес дене погеныт, калыкым палыш дене сийленыт, гармонь да тальянке сем почеш кандырам пунаш туныктеныт. Изирак уна-влакым йыдал гоч тӧршытл да вӱд йоген модыктеныт, тыгак марий аралтыш курчакым ышташ туныктымо. Площадь покшелне шогышо кумда сценыште, «ЮМарий» коллектив такмак-влакым йоҥгалтарыш да Кельмаксола вел куштымашым ончыктыш. Федоровский гыч «Сибирь марий» ансамбль шкешт пелен марий вургеман икшывыштым луктын тошто марий куштымашым ончыктыш. Тыгак сценыште Сергей Янсубаев, Сергей Байназов, Юрий Сайсанов шке мастарлыкыштым ончыктеныт. Пайремыш ий еда верысе марий-влак веле огыл, пошкудо олала гычат погынат. Тений Ханты-Мансийск, Лянтор, Пойковский да Нижневартовск гыч толыныт, пырля кечым эртареныт.

Ешарен каласаш кӱлеш, тений пайремыш эше спорт ден кылдалтше мероприятийым ушымо лийын. Тиде олаште кокымшо ий эртыше, калыкле тӱвыран спартакиаде, икмыняр модмашыже. Сургутысо «Марий ушемын» нарде дене да шахмат дене модшо командышт ойыртемалтыныт, кокытынат кумышо верым налыныт. Арня ончыч волейбол дене 5 верыш лектыныт, сентябрь тылзыште лийшаш мини-футболлан ямдылалтыт.

Раисия Сунгурова, лӱмын «Кидшер» интернет-журналлан

Кидшер
Шонымашым ешараш