Пеледыш пайрем — марий калыкын ик эн йӧратыме да вучымо пайремже.
Икымше гана Пеледыш пайрем 1920 ийыште Йошкар Пеледыш пайрем лӱм дене Шернур селаште эртаралтын. Тылеч вара Пеледыш пайрем Татарстан, Башкортостан республиклаште, Киров, Екатеринбург областьлаште, Моско, Санкт-Петербург, Пермь, Чебоксар олалаште да тулеч моло вереат эртен.
Ты пайрем пашам чаплын шуктышо калыкым саламла, марий айдемылан марий улмыжым шижаш, умылаш полша, иктеш ушнен. йылмым, муро, куштымаш поянлыкшым, сылне вургем ойыртемжым аралаш кумылаҥында. Моло калык дене пырля келшен илаш ӱжеш.
Тений тиде сылне пайрем 25 июньышто Йошкар-Олаште регион-влак кокласе «Пеледыш пайрем» семын эртен. Йӱла почеш, пайрем Тумер отышто Агавайрем кумалтыш гыч тӱҥалын.Тиде жапыштак Рÿдö паркыште кудо-влакым (уна пӧртым) вераҥдаш тӱҥалыныт, кидмастар-влак шке ӱзгарыштым, районласе ялозанлык предприятий-влак сатуштым ужалымашке луктыныт. Уна пӧрт-влак коклаште «Кудо» конкурс эртен.
Пайремыш толшо калыклан Ленин лӱмеш тӱвыра полат ончылно ансамбль-влак концертыштым ончыктеныт. Варажым, Йошкар-Оласе да республикысе районла гыч усталык коллектив-влак, мер организаций да калыкле-тӱвыра объединений-влакын еҥышт погыненыт. Пайрем колонно Ленин проспект мучко Ленин лӱмеш площадьыш ошкылын. Площадьыште «Пеледыш пайремым» почмо торжественный церемоний да театрализоватлыме представлений эртеныт.
Варажым, пайрем колонно Комсомольский урем дене Рÿдö паркыш тарванен. Программе дене келшышын кечыгут тӱрлӧ тӱвыра да спорт мероприятий-влак эртаралтыныт: «Марий кудо», «Йоча вургем», «Марий ÿдыр», «Эх кувавай!» «Онарын тукымжо» да«Марий солык» конкурс-влак, «Йыр куштымаш» фестиваль да «Марий кас» эртеныт.
Пайрем этнодискотеке дене мучашлалтын.
