Тыгайже театр тургымышто ик гана веле лиеш. 28 октябрьыште, Морко тӱвыра полатыште Шкетан театрын артистше-влак шке мастарлыкыштым ончыктат.
Районлаште илыше марий-влак деке М.Шкетан лӱмеш марий кугыжаныш драме театр эре лекташ тырша. Тиде гана артист-влак Морко кундемыште илыше калыкым куандараш тӱҥалыт. Кечывалым йоча-влаклан келыштарыме йомакыште модыт гын, а кастене моткоч оҥай, кумылым нӧлтышӧ спектакльым ончыктат. Тӱн рольышто – театрын тӱҥ режиссержо Роман Алексеев. Роман Юрьевич шагалже годым модеш, сандене зритель-влаклан йӧратыме артистше дене уэш вашлияш пеш кугу пиал. Тыгак Светлана Строганова, Сергей Данилов, Марина Почтенева да молат лийыт. Спектакльыште шӱмеш кодшо, кумдан палыме руш муро-влак марла йоҥгаш тӱҥалыт. Тылеч посна билетым налшымат пӧлек вуча. 200 теҥгелан налме билет почеш лотерей модылтеш.
Шкетан театрын юзо шӱлышыже Морко тӱвыра полатыште кечымучко илаш тӱҥалеш.
10.00 – В.Абукаев-Эмгак «Серебряный колокольчик» йомак.
12.00 – Е.Шашин, Н.Кузьминых «В некотором царстве…» «Царевна-лягушка» руш калык йомак негызеш шындыме музыкальный спектакль.
18.30 – Н.Дьяконов «Молан вашлийым тыйым?…» музыкальный комедий.