Марий кугыжаныш университет пелен улшо Калыкле тӱвыра да тӱвыра кокласе кыл институтышто Финн йылме да тӱвыра дене кеҥеж курс шке пашажым мучашлен.
Марий кугыжаныш университетыт пресс-службыжын палемдымыж почеш, кум арня жапыште студент-влак финн йылме да тӱвыра программым келгын тунемыныт. Преподаватель-шамыч шинчымашым пеҥгыдемдаш манын интерактивный урокым, ролевой модышым, «йыргешке ӱстелым», кейсым да моло йӧным кучылтыныт. Кеҥеж курс жапыште МарГУ-н унаже-влак финн-угор калык-влакын кухньыштым шымленыт да тӱрлӧ кочкышым тамлен онченыт. Тыгак студент ден преподаватель-влак марий куштымаш, марий йылме дене шинчымашым налыныт. Культур программат оҥай лийын: С.Г. Чавайнын мемориал музей-пӧртышкыжӧ, Т. Евсеев лӱмеш национальный тоштерышке, Козьмодемьянскысе кава йымалсе культурно-исторический комплексышке миен коштыныт. Уна-влак Йошкар-Ола дене кумылын палыме лийыныт.
Курсым эртараш CIMO Мобильность шотышто тӱнямбал рӱдер полшен.
