Идалык мучашке лишемеш. Могай тудо лийын? Могай событий дене илышыштына тиде ий шарналт кодеш? Могай лӱмгечым пайремленна? Кӧм ме йомдаренна? «Кидшер» интернет-журнал эртыше идалыкын тӱрлӧ событийжым шарналта.
Карай кундемыште
Портышкем пайрем
Республикыштына Портышкем пайрем поро йӱлашке пура. Тений тиде пайрем 23 январьыште Волжск районысо Карай кундемыште эртен.
Пайрем жапыште мастер-класс, теле ярминга, ече дене коштмаш, тӱрлӧ таҥасымаш, куштымаш-мурымаш эртеныт.
Марий калыкын
Х погынжо эртен
Шочмо калыкна Х калык погыныш чумырген. Марий калык погын нерген чумыр материалым кылвер почеш муаш лиеш.
Уста йылмызынам йомдарыша…
Ага тылзын 14 кечынже Советский районын эргыже, филологий шанче кандидат да доктор, профессор Анатолий Николаевич Куклинын шӱмжӧ вучыдымын кырымым чарнен. Тудлан 68 ий ыле. Ме тачат тудым порын шаренена.
Тӱрлӧ тӱсан Пеледыш пайрем
Йошкар-Олаште эртен
Пеледыш пайрем — марий калыкын ик эн йӧратыме да вучымо пайремже. Кузе тений тиде пайрем эртен кылвер почеш лудаш лиеш.
«Шийгорно – 2016»
«Кугарня» газет редакций 25 ияш лӱмгечыже темме вашеш «Шийгорно» программе дене Пошкырт кундемышке миен коштыныт. Тидын нерген «Кидшер» интернет-журналыште «Шийгорно» проект дене Татьяна Пчёлкина палдарен. Проектын материалже-влакым кылвер почеш лудаш лиеш.
«Яндекс.Переводчик» марий йылмым пала
Тений гыч «Яндекс.Переводчик» сервисыште марий йылмат уло. Олыкмарий ден курыкмарий мут-влакым 85 тӱрлӧ йылмыш кусараш лиеш. Мутат уке, шочмо йылмынам арален да вияҥден колтымаште тиде кугу паша.
Марий йылмым мультфильм дене туныкташ
Тылеч посна марий йылмым марий мультфильм-влак дене тунемаш йӧн лектын. Республикысе марий тӱвыра рӱдер мультфильм-влакым луктын.
Вячеслав Абукаев-Эмгак премийын
лауреатше-влак пале лийыныт
У ий вашеш Вячеслав Абукаев-Эмгак лӱмеш премийын лауреатше-влакын лӱмышт пале лие.
Эн сай теле да радио-журналист, блоггер паша номинацийыште «Ший памаш» фондын дипломжо да «Канде толкын» премий дене «Марий Эл Радион» вӱдышыжӧ Татьяна Соловьёва ден блоггер Николай Любимов палемдалтыныт. Поэзий номинацийыште Алёна Яковлева ден Вера Гордеева ойыртемалтыныт. Нунат диплом да «Кинде-шинчал» премий дене палемдалтыныт. Эн сай журналист пашалан «Марий Эл» газетын пашаеҥже Лидия Шабдарова ден «Кугарня» газетын пашаеҥже Татьяна Айтова «Виш чон» премийым налыныт.