Марий Оньыжа калыкым У ий дене саламлен

Марий Оньыжа Эдуард Александров марий калыкым У ий пайрем дене саламлен.
«У ийым у пиал, у сеҥымаш дене кылдена. Йомак сынан пайрем мыланна у ÿшаным конда, вий-куатым ешара. Тудым эше еш пайрем манына. Чынже денак, ты пагатыште еш, родо-тукым дене вашлияш, икте-весын вачыжым шижаш, ваш-ваш чон кумылым пöлеклаш йöн пÿралтын. Меат, кумда тÿня мучко шарлен илыше марий калык, шкеннам ик еш семын ужшаш улына, вет мемнам ик йылме, тÿвыра, йÿла ушат. Родо-тукым кылнам арален, вияҥден шогышаш улына. Посна укшым вашке тодылыт, а ик аршашыш чумыргышо шуко укшым тодылаш моткоч неле.
Пайрем дене! У идалык кажне еҥлан волгыдо, тыматле, йомартле лийже! Тумо гай пеҥгыде тазалыкым тыланем. Палемдыме пашада илышыш шыҥдаралтше, у шонымашда-влак шукталтышт. Чоныштыда эреак кече шыргыжше, пеленда эн йöратыме, лишыл еҥ-влак лийышт», — тылана Оньыжа.

Кидшер
Шонымашым ешараш