Лариса Яковлева: «Таза, пиалан, кӱдыратле куатан лийза, марий-влак!»

1556 ий 26 апрельыште Болтуш онна марий калыкнан эрыкшым да мландыжым арален кодымо годым вуйжым пыштен. 1917 ийыште икымше марий погынышто тале просветитель П.П.Глезденев тиде кечым Марий талешке кече семын палемдаш ойым луктын. 1991 ий гыч тудым кугыжаныш пайрем семын палемдена. Ты шарнымаш кечым калыкнам иктеш чумырышо вий семын ужына. 
Ик курым весым алмашта, но шочмо мландым арален да саклен толшо эргыж ден ӱдыржӧ-влакым калыкна огеш мондо. Болтушым, Чумбылатым, Онарым, Чоткарым, Пашканым, Акпатырым, Акпарсым да молымат шарнена. Тиде шарнымаш тукым гыч тукымыш кусна. Кугу Ачамланде сарыште кредалше да тылыште пӱжвудым йоктарыше коча-кована, ача-авана-влаклан пиална, чапна верчын шогымыштлан тауштен илена. Тӱрлӧ сферыште кӱкшӧ лектышыш шушо, марий калыкын чапшым кӱшнӧ кучышо землякна-влак дене кугешнена. Нунын лӱмышт шӧртньӧ буква дене курымсерышеш возалтыт.
Кугезына-влакын марий калыкын шамжым нӧлтымӧ, шочмо йылме ден йӱлам вияҥден колтымо надырышт самырык тукымым маяк семын волгалтарат, калык верч тыршыме пашаш ушат манын ӱшанем.
Таза, пиалан, кӱдыратле куатан лийза, марий-влак! Шочмо кундемым тӱзатымаште да вияҥдымаште кугу сеҥымашыш шуаш тыланем.

Лариса Яковлева,
«Российысе марий-влакын федерал калыкле-тӱвыра автономийышт»
мер ушем советын председательже.

Кидшер
Шонымашым ешараш