Марий самырык тукым слёт 2009 ий годсек кажне ийын эртаралтше мероприятий. Организатор-влак палемдат: «Слёт ончыко ончышо шонымаш-влакым илышыш шыҥдара: самырык тукымын социальный чолгалыкшым нӧлтала, тудым марий калыкын тӱвыражым да йылмыжым аралымашке да вияҥдымашке шке надыржым пышташ кумылаҥда; калык ден тӱвыра-влак кокласе кылым вияҥдаш полша; пӱтынь Российысе икоян улмым, икте-весым пагалымаш кумыл-влакым вияҥда».
2014 ийыште VI слёт 29 июнь гыч тӱҥалын 6 июль марте эрташ тӱҥалеш. Кажне слёт шке ончылныжо посна задаче-влакым шында. Мутлан, V слёт граждан-влакын чолгалыкыштлан пӧлеклалтын гын, ты гана тӱрыс слёт «Самырыктукым да верысе кучем» теме дене кылдалтеш. Самырык-влак, слётын программыштыже участвоватлен, усталык мастарлыкым шуарыше пашашке ушнат: лекций да семинар занятий-влак, шымлызе, мер пашаеҥ, депутат, кидмастар, яра жапым да тазалыкым пеҥгыдемдыше мероприятий-влакым организоватлыше-шамыч дене вашлиймаш, тыгак тӱвыра-историй верлашке экскурсий-влак лийыт. Слётыш толшо-влак сайлымаш кампаний, депутат паша нерген шуко пален налыт да шкештат тидын гоч модын эртат.
Слётыш Марий Эл Республик деч посна Российыште марий-влакын тӱшкан илыме эше тӱрлӧ регионжо гыч самырык-влак чумыргат: Пошкырт, Татарстан, Одо Республик, Киров, Угарман да Свердловск вел, Хант-Мансий автономный округ – Югра, Пермь край, Моско, Санкт-Петербург.
Ушештарем, слёт Параньга район Олор кыдалаш школ пелен, 29 июнь гыч 6 июль марте эрташ тӱҥалеш. Тиде слёт гыч ме тӱрлӧ сынан материал-влакым тыланда лудаш ончаш темлаш тӱҥалына.
