«Марий книга издательстве» савыктыш пӧрт С.Дмитриев ден С.Мустафинан ямдылыме «Йылмым тунемына» марла-рушла-англичанла сӱретан мутерым савыктен луктын.
Книга марий, руш да англичан йылмым тунемаш тӱҥалше йоча-влаклан темлалтеш. Тудо тӱҥалтыш школышто туныктышо ден ача-ава-влакын сай полышкалышышт лийшаш. Сӱрет дене сєрастарыме тиде мутерыште кум кугу ужаш уло: «Айдеме», «Обществе», «Пӱртӱс». Мутерыште нине теме дене кылдалтше шомак-шамыч темлалтыт.
«Кидыштыда – «Марла-рушла-англичанла сӱретан мутер», – лудына книгасе ончылмутышто. – Йылме-влакым тунеммаште тудо тендан чын полышкалышыда лийшаш.
Пашам моштен ворандарен колташ гын, ыштышаш сомылда куандарыше лийын сеҥа. Йылмым вигак куштылгын да писын умылен налмаште кугу суапым книгасе сӱрет-шамыч шуктат. Сӱрет негызеш йоча-влак у мут дене палыме лийыт, у йӱк-шамычым чын каласаш тунемыт, муткылдыш ден предложенийым чоҥат да йылмыштым лывыртат».
Книгам республикын «2013-2020 ийласе жаплан Марий Эл Республикын кугыжаныш национальный политикыже» программыж почеш «Чувашия» ИПК» акционер обществе савыктен луктын. Тиражше — 1000 экземпляр.
Евгений Садовин.