Марий калык конгрессым вуйлатыше Евгений Кузьмин ден исполкомжым вуйлатыше Эдуард Иманаев Курыкмарий районышто лийыныт да мер организацийын тусо чолга еҥже-влак дене вашлийыныт.
Мутланымаш эртыше пагытыште шуктымо пашам иктешлыме да ончыкылан планым рашемдыме дене кылдалтын. Конгрессын районысо пӧлкажым тымарте Магдалина Егорова вуйлатен. Тудак ворандарыме пашам иктешлен. Погынышо-влак пӧлкан у вуйлатышыжым сайленыт, ӱшаным Светлана Ероновалан ыштеныт, воза «Марий Эл» газет.
Погынымаш деч вара Марий калык конгрессын еҥже-влак Шалаболко кундемыште, марий археолог-влакын пургедме верыштышт лийыныт. Тений нунын пашашт лектышан: археолог-влак тушто XIV курымысо марий илемым верештыныт. Кызыт пургедме паша умбакыже шуйна.
Дмитрий Иванов, «Кидшер»