Самырык-влакын политикышт, спорт да туризм министерствыште эл кӧргысӧ туризмым вияҥдымаште марий Эл Республикысе вуйлатышын премийым налше-влакым палемденыт.
Тыге «Марий Эл Республикысе туризм объектым саемдымаш» номинацийыште «Тӱвыра наследийым аралыше ушем» Чарла кремльыште Шонымым шуктышо пушеҥгым вераҥдаш темлен. Пушеҥге регионышко толшо турист-влакым шукемдаш полша, да Йошкар-Олан эше ик палыме верышкыже савырна, ӱшанат автор-влак.
«Марий Эл Республикысе туризм шотышто эн сай увер проект» номинацийыште Йошкар-Оласе эртык тоштер «Унам вашлийын моштышо Йошкар-Ола» проектым темлен. Оласе тӱвыра учрежденийлаште, кочмыверлаште, вокзаллаште турист навигаций дене кылдалтше, кызытсе жаплан келшыше увертарымаш-влакым вераҥдаш шонат.
Морко районысо тоштер «Марий Эл Республикысе туриндустрий субъектын пашажым вияҥден колтымаш» номинацийыште ойыртемалтын. Тоштер пашаеҥ-влак районыштышт турист-увер рўдерым почнешт. Тудын полшымыж дене шке турпродуктыштым темлаш тӱҥалыт.
Грантым сеҥен налше-влаклан 100 тӱжем теҥгем кучыктышаш улыт.