Калык фронтын чолгаеҥже-влак «Генеральная уборка страны» арулык кечым эртареныт

Талук утла жапыште Калык фронтын интерактив картыштыже Марий Элыште 189 свалкым ончыктымо. Тушечын 135 петырыме.

«Калык фронт» Пӱтынь Российысе мер толкынын чолгаеҥже-влак «Генеральная уборка страны» маналтше арулык кечым эртареныт. Вет элна мучко закондымын шӱкшакым кышкыме тӱжем дене верым пытараш кулеш. 

Акций поро йӱлашке савырнен. Икымше гана огыл Калык фронтын чолгаеҥже-влак Тумер отым шӱкшак деч эрыктат. Тиде гана нунын дене пырля инвалид-влакат лийыныт. Чылаже акцийыш 20 утла еҥ толын. Ик шагат жапыште нуно кумло утла мешак шӱкшакым погеныт.

«Ӱмаште мемнан экологий идалык эртен. Кугу тӱткышым кундемым шӱкшак деч эрыкташ ойыралтын. Теният президентнан кӱштымашыже почеш, тиде йодыш кокымшо планыш огеш кораҥ. Шӱкшакым кораҥдымаште системный подходым ышташ кӱлеш» палемда Калык фронтын марий региональный пӧлкажын СМИ дене пашам ыштыше координаторжо Ольга Кузьмина.

Талук утла жапыште Калык фронтын интерактив картыштыже Марий Элыште 189 свалкым ончыктымо. Тушечын 135 петырыме. Туге гынат шке гыч шӱкшакым кышкыме вер-влак эре лектыт. Мер пашаеҥ-влак тыгай акцийым идалыклан кок гана — шошым да шыжым эртараш шонат.

Кидшер
Шонымашым ешараш