Марий Элыште туризмын лидерже-влак пале лийыныт

Марий Элын Самырык политике, спорт да туризм министерствыжын увертарыме «Марий Эл Республикысе туризмын лидерже» конкурсшо иктешлалтын. 

«Идалыкын окрытийже» номинацийыште икымше верыш «Изба» ООО, кокымшыш Йошкар-Ола историй тоштер пелен пашам ыштыше Турист-увер рӱдер, кумшыш Звениговысо межпоселенческий библиотеке лектыныт.

«Идалыкын эн сай турист продуктшо» Йошкар-Ола историй тоштерын лийын.

«Массовый информаций средствылаште Марий Эл Республикын турист продуктшым шӱкаш полшымаш» номинацийыште икымше вер дене «Марий Эл» газетын журналистше Светлана Носова, кокымшо вер дене «Край Горномарийский» газет гыч Владимир Ёлкин, кумшо вер дене «Край Сернурский» газет гыч Елена Тетерина палемдалтыныт.

«Идалыкын эн сай экскурсийже» номинацийыште Йошкар-Ола историй тоштер гыч Максим Рыбаков ойыртемалтын.

«Марий Эл мучко идалыкын эн сай маршрутшо» номинацийыште икымше вер предприниматель Александр Степановлан, кокымшо вер Звениговысо межпоселенческий библитотеклан да кумшо вер Юрино районысо Социокультурный комплекс гыч Татьяна Борисовалан логалыныт.

«Идалыкын эн сай турист сувениржылан» «Яндар» ООО-н чайжым шотлымо.

Кидшер
Шонымашым ешараш