«Марий Эл» кугыжаныш теле ден радио компаний ден Шкетан лӱмеш марий кугыжаныш драме театр «Микрофон ончылно театр» проектым илышыш шыҥдарат.
Марий радио «шӧртньӧ» шӧрлыкыштыжӧ аралалтше радиоспектакль-влакым интернетыш луктеш. Тачысе кечылан, интернет йӧн дене «Кеҥеж йӱд», «Илыше вӱд», «Салика» радиоспектакль-шамычым колышташ йӧн уло. Ынде эше кок тошто спектакль ешаралтын — «Оръеҥ мелна» ден «Мӱкш отар».
«Марий Эл» кугыжаныш теле да радио компанийын сайтыштыже лӱмлӧ, палыме артист-влакым: Виктор Бурлаковым, Иван Якаевым, Майя Романовам, Мария Сапожниковам, Иван Никитиным, Георгий Пушкиным да молынат йӱкыштым колаш лиеш.