Марий шанчыеҥ-влак Тӱп калык-влакын тӱнямбал идалыкын кӱлешлыкшӧ, тиде идалык шочмо йылме-влаклан вияҥаш йӧным ыштыме нерген ойлат.
«Тиде шкешотан, вий-куатым, ончыкылыклан ӱшаным пуышо идалык, кажне калыклан. Поснак Марий Эл Республикыште илыше марий, руш, татар, удмурт, чуваш да моло тӱрлӧ калыкланат, тиде идалык эше икте-весе дене вашкылым муын, ончыко виянаш полышышаш. Тыште кугыжаныш велым полыш лиеш. Марий йылмым вияҥдыме шотышто поснак, мутым лукташ гын, туныктымсо паша кызыт мемнан окшакренрак кая, туныктымо пашам йолӱмбаке шогалтыман», — ойла В.М.Васильев лӱмеш МарНИИЯЛИ директорын алмаштышыже, филологий науко кандидат Людмила Григорьева.
«Кеч-могай йылмат, ме тудым аралышаш гына огыл, ме кутрышаш улына, кутрымына годым икте весынам пагалышаш улына. Йот йылмым колына гын, мыланна тиде оҥайын чучшаш, тудым пален налаш, тыгай кумыл шочшаш. Мемнан кӧргыштына, чоныштына, могай тиде калык, могай тӱвыраже, мый тидым пален наламда — виянрак лиям, шонышаш улына. Мыйын шонымаште — тиде тӱҥ тачысе кечын, тиде ийын. Ӱшаныме шуэш, ончыкыжымат тиде шонымаш дене илаш тӱҥалына», — палемда Марий йылме рӱдерын директоржо, филологий науко доктор, МарГУ-н профессоржо Любовь Абукаева.
Тений Марий Элыште идалык дене кылдалтше 30 утла мероприятий эртышаш. Тӱп калык-влакын йылмыштын Тӱнямбал идалыкшым ООН увертарен. Россий федерацийыште тудым ямдылыме да эртарен колтымо шотышто организационный комитетым ыштыме.