Марий калык конгрессын тачысе тӱҥ задачыже, паша корныжо нерген ушемын вуйлатышыже Евгений Кузьмин палдарен.

«Марий калык конгрессын тӱҥ рольжо тиде научно-просветительсикй сынан. Мемнан эртыкнам, йӱланам, тӱвыранам эше чот шараш: кутыраш, калык дене вашлияш. Тӱрлӧ районлашке, марий калыкын илыме верлашке лектын кошташ тиде ийынат, кодшо ийынат тыгак ыле. Мутлан, Курыкмарий пӧлкам археолог-влак деке луктынна. Тунам нуно Ул Салаволкы селищым кӱнчат ыле», — ойла Евгений Кузьмин.

Марий калык конгрессын вуйлташыже вашлталтме амал дене ушемын паша радамыштыжат вашталтыш лийыныт, палемда мер пашаеҥ.

«Мутат уке, кузе ойлена, историйыште личностьын рольжо. Кунам мыйым у вуйлатышылан сайленыт — изиш сынжат вашлталтын. Тиде: культурно-просветительский, научно-просветительский сынан. Тиде кӱлеш. Марий калыкын шке шамже эре кушкеш ойлат. Чылан историй нерген пален налнешт, а тидын нерген лачшымак шанче могырым, шымлызе семын кутыраш кӱлеш. Укеж гын, тиде тӱрлӧ фентезий версий семын ужыт, тидат оҥай, но эртыкым локтыл кертеш. Мемнан историйым изиш пужен умылаш тӱҥалыт. Тиде сай огыл. Историй — тиде политикыш ончалме эртык. Историйым огына колышт гын, тудо мемнам чот туныктен налеш. Историйым эре колыштын шогаш кӱлеш», — иктешлен каласыш шанчыеҥ.

Евгений Петрович Кузьмин — В.М.Васильев лӱмеш Йылмым, сылнымутым да историйым шымлыше марий институтын директоржо. 2018 ийыште пургыж тылзын Марий калык конгрессын председательжылан сайлалтын.

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.