Мыскараче-влак «Воштылаш, товатат, сулык огыл!» конкурсыш Йошкар-Олаште чумыргеныт

Пайрем Сеҥымашын ХХХ-шо идалыкше лӱмеш тӱвыра полатыште лие.

«Воштылаш, товатат, сулык огыл!» мыскара фестиваль-конкурс вӱдшор тылзын 1-ше кечынже эртыш. Конкурсыш районлаште ойырымо турым эртарыме деч вара ойыртемалтше, оҥай мыскараче-влак чумыреныт.

Икымше верым Волжский районысо Чодыраял Корамас гыч «Чоткар тукым» коллектив «Марлан кайынем» сценкыж дене нале. Кокымшо вер дене Морко район гыч Лариса Семёнова ден Наталья Алексеева «Ынде ман» сценкышт дене палемдалтыныт. Кумшо верым кок артист: Марий самырык театрын актёржо Михаил Александров («Оньыкува») да М.Шкетан лӱмеш Марий театрын актрисыже артисткыже Марина Почтенева («Тӱшка паша») — мыскара монологышт дене сеҥеныт.

«Мыскараче мурызо» номинацийыште Оршанке район Чирки гыч «Ош куэ» да МарГУ пеленысе «Марий мурсем» ансамбль-влак палемдалтыныт. Кумылаҥдыше призым Волжский район Сотнур гыч Никас ден Илья Игнашевмытлан «Ну, мо вара?» койдарчык мурыштлан пуэныт.

Ушештарена, икымше гана «Воштылаш, товатат, сулык огыл» конкурс 1994 ийыште кок кече – 1 да 2 апрельыште – М.Шкетан лӱмеш театрыште эртен. Тунам тудым «Кугарня» ден «У вий» мер ушем эртареныт. Ынде 25 ий конкурсым «Кугарня» газет редакций эртара.

Кидшер
Шонымашым ешараш