(Йошкар-Ола, 5 август, «Кидшер», Аркадий Сергеев). Марий Эл Кугыжаныш Погыныш депутатлан кандидат-влакым регистрироватлыме йыжыҥ мучашлалтын. Сайлыме кампанийыште чылаже 394 кандидатым регистрироватлыме.
Ик мандатан сайлыме округлаште 166 еҥым регистрироватлыме. Тушечын 7-ше шке семын ушнышо, 159-ыже 7 сайлыме ушем деч. Республикысе округ деч 228 кандидатым 6 сайлыме ушем деч регистрироватлыме.
Рӱдӧ сайлыме комиссий куд сайлыме ушем деч республикысе кандидат-влакын спискыштым регистрироватлен. Тиде Единый Россий, Справедливый Россий, КПРФ, ЛДПР, пенсионер-влакын партийышт социал чынлык верч, Российын Коммунистше- влак полит партийын верысе пӧлкаже-влак.
Ушештарена, 8-ше сентябрьыште марий парламентыш 52 депутатым сайлышаш улына. Нуно 2024-ше ий марте пашам ышташ тӱҥалыт.