Марий Эл Республикысе тÿвыра, печать да калык-влак паша шотышто министерстве марла возышо сайт, портал, блог да Интернет-тӱшка-влакын «Марнетын шÿдыржö-влак» конкурсым эртара.
Конкурсыш кеч-кушто илыше, кеч-могай гражданстван, тыгодым марий йылме дене интернет-лаштыкым вÿдышö, сайт ден портал-влакым (тыгак нунын иктаж ужашыштым) ыштыше да шуяш полшышо юридический ден физический лица-влак вийыштым терген кертыт.
Конкурс вич номинаций дене эрта:
- Кугыжаныш кучем органын эн сай сайтше.
- Тÿвыра, туныктыш тöнежын эн сай сайтше.
- Марий йылме дене савыкталтше ТУЙ-ын сетьысе эн сай версийже.
- Марий калыкын сымыктышыжым, тÿвыражым, историйжым, йылмыжым да йÿлажым почын пуышо эн сай тематике сайт.
- Посна авторын эн сай интернет-дневник (блог, микроблог), Интернет-тӱшка.
Конкурсант-влак йодмашым идым тылзын 1-ше кечыж гыч кылме тылзын 1-ше кечыже марте Марий Эл Республикысе тÿвыра министерствыш (424002, Йошкар-Ола, Кремлевский урем, 41) колтен кертыт. Конкурсышто сеҥыше-влакым декабрьыште палемдат.
Лекше йодышым 8 (8362) 42-20-04 телефон але pressa_mincult12@mail.ru электрон почто дене рашемдаш лиеш.