Марий Оньыжа: Регион-влак кокласе Пеледыш пайрем дене!

Пагалыме марий калык. Мер Каҥаш лӱм дене чыладамат уло кумылын ик эн чапланыше, волгыдо да кумылым нӧлтышӧ, тыгодымак пиалан илышлан ӱшаным пуышо Пеледыш пайремна дене саламлем! Ончыкыжымат шочмо йылмынам аклаш, марий тӱвыранам вияҥден шогаш, кугезе йӱланам жаплаш ӱжам.
Эше шÿдö ий ожно кугезе калыкна шошо ага пашам ыштен пытарымеке, пӱртӱсын ужарген шогалын, вийым налме пагытыштыже Агавайремым, а кеҥеж тÿҥалтыште Семык пайремым эртарен гын, кызыт тиде пагытыште ме уло кумылын Пеледыш пайремым палемдена.
Кызыт тудо эшеат у сыным налын. Угыч рӱдӧ оланан тӱҥ уремже дене калыкнан пайрем кумыл дене эртымыже кажныжым марий улмыж дене кугешнаш тарата. А акрет Марий кундемна ӱмбалне йоҥгыдо марий муро да шочмо йылмым чапландарыше марий ой кажнын чонжым вӱчкен йогалтеш. Волгыдо да куанле Пеледыш пайрем вашеш кажне марий еҥлан пеҥгыде тазалыкым, кужу ӱмырым, вашла пагалымашым, пиалым да шочмо кундемнам тӱзатыме лӱмеш тыршыме пашаште сеҥымашым тыланем.
Пеледыш пайрем дене!

Марий Оньыжа Анатолий Николаевич Иванов.

Кидшер
Шонымашым ешараш