Звенигово районышто газым шеледен тулышо станцийым пашаш колтымо

Звенигово районышто «Кокшамары» газым шеледен тулышо станцийым срок деч ончыч пашаш колтымо. Тудо Марий Эл Республикын Звенигово районыштыжо 720 утла суртыш да Юл эҥер серысе Чебоксар олаште 1750 сурт ден пачерыш газым пурташ йӧным пуа.

ГРС-ым да газ пучым пашаш колтымо торжественный церемонийыште Россий Федераций Федеральный Погынымашын Федераций Советшын Председательжын икымше алмаштышыже, «Единый Россий» партийын генеральный советшын секретарьже Андрей Турчак, Марий Элым вуйлатыше Юрий Зайцев, Чувашийым вуйлатыше Олег Николаев, да «Газпром межрегионгаз» ООО-н генеральный директоржо Сергей Густов лийыныт.

Газым ситарен шогымо системыш эн ончыч Чебоксары олаште «Россиянка» ФОК-ын котельныйжым ушымо . Сандене лач тудын айлыме кундемыш ты мероприятийын участникше-влакым ӱжыныт.

Россий Федераций Федеральный Погынымашын Федераций Советшын Председательжын икымше алмаштышыже, «Единый Россий» партийын генеральный советшын секретарьже Андрей Турчак «Единый Россий» партий дене пырля «Газпром» ПАО-н шуктен толмо газификаций программе нерген каласкален. Тендам тиде пайрем дене алал кумылын саламлынем. Марий Элын вуйлатыше командыжлан тауштем. 80 километр наре кужытан газ пучым шупшмо, тиде чынже денак кугу паша. Тышеч 30 километрже Марий Эл Республик мучко шуйналтын, 50 километрже – Чуваший мландыште. Тиде пашам шуктышо подрядчик компаний пашам писемден колтен, 2023 ийысе шошо олмеш кызытак пашам мучашлен, каласен Андрей Турчак.

Марий Элым вуйлатыше Юрий Зайцев погынышо-влакым саламлен да кок регионым экономике ден социальный велым умбакыже вияҥдымаште «Кокшамары» ГРС-ын кӱлешан улмыжым палемден.

Чувашийым вуйлатыше Олег Николаев Чебоксар олан Юл эҥер серысе ужашыштыже илыше-влак тиде событийым шуко ий вученыт манын да ты йодышым тӧрлаш полшымылан Юрий Зайцевлан тауштен ойлен.

«Газпром межрегионгаз» ООО-н генеральный директоржо Сергей Густов компаний субъект-влакын вуйлатышыштын подписатлыме газификаций программым радамлын шуктен толеш, сандене палемдыме шуко мероприятийым срок деч ончыч шукта манын каласен.

СМИ-н еҥже-влаклан интервьюм пуымыж годым Марий Элым вуйлатыше Юрий Зайцев республикыште газификаций да догазификаций программе-влакым шуктен толмо нерген радамлын каласкален.

«Марий Эл» газет

Кидшер
Шонымашым ешараш