Россий Федерацийыште региональный вияҥмаш шотышто правительстве комиссийын президиумжын заседанийыштыже национальный да региональный проект-влакын кузе шукталт толмыштым каҥашеныт. Тудым Россий чоҥымо да илыме вер да коммунал озанлык министр Ирек Файзуллин вӱден. Марий Эл вуйлатыше Юрий Зайцев заседанийын пашашкыже ушнен.
Республикыштына проект-влак почеш паша график дене келшышын ышталтеш. Мутлан, «Оласе йырвелым йӧнаным ыштымаш» федеральный проект почеш Марий Элыште 92 кумдыкым: калык тӱшкан коштмо 55 верым да 37 кудывечым – тӱзатыме. 2023 ийыште эше 77 кумдыкым шотыш кондаш тӱҥалыт, нуным тӱзатышаш верч 4 тӱжем еҥ йӱклен.
«Илаш йӧрдымӧ илыме вер фондым шагалемдаш йӧным ыштымаш», «Яндар вӱд», «Юлым тазаҥдымаш», «Спорт – илышын нормыжо», «Тазалык аралтышын первичный звеножым модернизироватлымаш» региональный да «Илыме вер» федеральный проект-влакым илышыш шыҥдарымаште сай лектыш шижалтеш. Тӱрыс ончымаште, чыла источникым шотыш налаш гын, Марий Элыште 10,8 млрд. теҥгем (идалыкаш лимитын 90% деч шукырак) кучылтмо.
«Марий Эл» газет