«Шӧртньӧ перо» да правительствын премийже

Марий Эл Правительствын премийжым налше-влакын лӱмышт пале лийын. Марий Элым вуйлатыше Юрий Зайцев журналистике аланыште «2022-шо ийыште Марий Элысе экономикын вияҥмыжым эн сайын ончыктымылан» Правительствын премийжым пуымо шотышто распоряжениеш кидпалыжым пыштен.

«Марий Элысе экономикын вияҥмыжым ончыктышо эн сай паша» номинацийыште «Марий Эл» ГТРК-н корреспондентше Константин Микрюков палемдалтын. «Ял озанлык нерген каласкалыше эн сай паша» номинацийыште «Ончко» журналын редакторжо Эрнст Петров палемдалтын. Социал сфера ден мер инициативым ончыктымаште «Марий Эл» газетын коллективше ончыко лектын. «Юринский рабочий» газетын коллективше тӱвыра илышым ончыктымо дене ойыртемалтын. Республикысе калыкын ойыртемжым ончыктымылан «Марий Эл телерадион» коллектившым палемдыме. Йоча да самырык- влакын йодышышт нерген эн сайын каласкалымылан «Молодёжная жизнь в Марий Эл» газетын коллективше премийым налеш.

Республикым вуйлатышын «Марий Элын Шӧртньӧ перожо» премийым тений «Марий Эл Радион» тӱҥ редакторжо Владимир Матвеевлан пуымо.

«Марий Эл» кугыжаныш телерадио компаний

Кидшер
Шонымашым ешараш