Михаил Васютин Калык переписьын марий калыкым шӱлыкаҥдыше цифрыжлан ӱшаныдымыжым каласен

Марий Эл Правительство председательын икымше алмаштышыже Михаил Васютин Калык переписьын марий калыкым шӱлыкаҥдыше цифрыжлан ӱшаныдымыжым каласен да ушештарен: пандемийлан кӧра преписчик-влак кажне еҥ деке миен шуын огытыл. Эше ик факторжо-калыкым шотлымаш цифран формат дене эртен. Переписьын ойыртемже-влак нерген тудо мер политик рӱдерыште общественностьын погынымаштыже ойлен.

У ий деч ончыч Росстат переписьын лектышыжым савыктен. Тудын дене келшышын Российыште марий калыкын чотшо 124 тӱжем наре еҥлан шагалемын.

«Тиде электрон йӧн дене эртарыме икымше шотлымаш лийын. Тидын годым южо еҥ-влак умылаш лийше ужашыжым гына возеныт, а молыжо: могай калык улмо, йылмым палыме нерген автоматически возалтеш манын коденыт», — каласен Васютин.

Тудын мутшо почеш, перепсчик еҥ деке миен шуын огыл гын, иктешлыме годым закон дене келшышын административный данный-влак кучылталтыныт. Йошкар-Олаштат тыгак лийын. Васютин тидымат ушештарен: Российыште 16 миллионат 600 тӱжем еҥын могай калык гыч улмыжым ончыктымо огыл. Тидыже 2010-шо ийысе перепись деч кум пачаш шукырак.

Вашлиймашыште «Марий сандалык» журналын тӱҥ редакторжо Валерий Мочаев республикысе калык- влакын раш чотыштым палаш манын, калыкын шке эртарыме переписьым ышташ темлен.

Перепись годым марий йылмым палымыже нерген 258 тӱжемат 700 еҥ гына ончыктен. Тыге лу ий жапыште йылмым палыше эше 192 тӱжем еҥ йомын. Тыге иктаж 20 ий гыч тудо экзотикыш савырна манын, тургыжланен каласыме.

Кидшер
Шонымашым ешараш